O seu interior acolle magníficas mostras de ourivaría relixiosa dos séculos XVI ao XX, destacando unha arqueta eucarística e unha custodia do barroco alemán, así como pezas pertencentes a diferentes escolas de prateiros españois entre as que se atopan cálices, relicarios, sacras ou incensarios.

Neste museo podemos atopar a prata doada por Dona María Ana de Neoburgo, que pasou a noite na Coruña con motivo da súa ligazón matrimonial co último Austria, o Rei Carlos II, en 1690.

Este edificio de nova planta, deseñado polo arquitecto Manuel Gallego Jorreto para albergar a colección de ourivaría relixiosa estrutúrase no seu interior ao redor da escaleira que se converte no elemento principal do edificio e que pretende aparentar un cofre en cuxo interior se gardan xoias.