O principal foco de comercios na Coruña concéntrase na praza de Lugo e na súa contorna. Parada obrigada en calquera percorrido pola cidade polo seu mercado e a súa arquitectura, neste punto e nas rúas lindeiras atoparás opcións de moda infantil e de adultos das principais marcas. Ademais de roupa e complementos, terás á túa disposición tendas de electrónica, material audiovisual, libros e papelaría.

Todo, como non podería ser doutro xeito, a poucos metros de locais onde tomar un bo café, un aperitivo co que repoñer forzas ou mesmo restaurantes nos que degustar os mellores menús coruñeses.

Movéndonos polo istmo xeográfico que une os dous extremos da cidade podemos continuar as nosas compras ao longo da rúa San Andrés. Coa praza de Pontevedra ás nosas costas, emprendemos un paseo repleto de pequenas e grandes firmas de calzado, cosméticos, moda, fotografías... Ao noso paso, tanto a esquerda como a dereita, teremos a posibilidade de perdernos momentaneamente en pequenas prazas como a da Galera ou a da Cormelana e deixarnos conquistar polo seu ambiente festivo e desenfadado.

Tamén podemos optar por percorrer de principio a fin a rúa Real, tradicional itinerario para quen busca unha compra asegurada na cidade. Negocios con varias xeracións aos seus mandos, séculos de historia na súa calzada e edificios históricos en cada portal. As túas compras combinadas coa conservación patrimonial.