O próximo martes 26 de setembro ás 18.00 horas temos un contacontos organizado en colaboración con ACEGA, Asociación de Celíacos de Galicia, dirixido a nenos e nenas de 3 a 7 anos, na Biblioteca Municipal Durán Loriga.

"Son Mariña!" é a historia dunha nena que diagnostican de celiaquía. A través da pequena Mariña, os/as máis pequenos/as poden comprender tanto os sentimentos da nena como as cousas que debemos ter en conta cando temos un amiguiño con celiaquía. Un conto que fomenta a inclusión na sociedade de todos os nenos e nenas con necesidades diferentes, ademais do respecto e a igualdade a través de diferentes personaxes, cancións e xogos.

A través de personaxes interpretados, a cativada poderá coñecer a historia de Mariña e as súas amizades. Unha historia que se conta a través de dous narradores, Pandoso, un osiño moi despistado, e o Doutor Neutronio, un científico, os que a través de xogos, cancións e bailes conseguen que os nenos e as nenas se divirtan e á vez aprendan acerca da enfermidade celíaca, a dieta sen glute, e a importancia dunha alimentación saudable, ademais de adquirir valores como a inclusión, respecto e igualdade.

ACEGA, Asociación de Celíacos de Galicia, é unha entidade sen ánimo de lucro, cuxo obxectivo fundamental é axudar a todas as persoas afectadas pola enfermidade celíaca e a dermatite herpetiforme.

Ofrecen servizos, tanto aos socios coma á sociedade en xeral, sendo algúns deles a información e asesoramento ao celíaco recentemente diagnosticado, orientando acerca de como levar correctamente unha dieta sen glute, publicacións especializadas, ou actividades de difusión, información e concienciación á poboación xeral, entre outros.