A Carreira Popular de Novo Mesoiro, última proba do circuíto de carreiras populares Coruña Corre, que debía celebrarse este domingo, 24 de novembro, queda suspendida debido á alerta amarela por fortes ventos que está prevista para esa xornada. A nova data, para a que se manterán as persoas inscritas previamente para este domingo, será o 15 de decembro.

Tras avaliar a predición meteorolóxica o Concello decidiu que a mellor opción ante a previsión de fortes ventos era a suspensión da proba, coa fin de preservar a seguridade tanto das persoas asistentes como do persoal traballador. Están previstos refachos de vento de 70 e 80 quilómetros por hora para esa xornada.

Desde o Concello da Coruña trasládase ás persoas afectadas que desculpen as molestias derivadas deste aprazamento.

Peche de parques

A alerta amarela por fortes ventos levará aparellado o peche de parques e xardíns durante a fin de semana. Salvo outra indicación posterior en caso de cambio da previsión meteorolóxica, o peche farase efectivo das 9.00 horas do sábado 23 ás 9.00 horas do luns 25. Tamén permanecerá pechada a Casa das Ciencias, por mor do peche do parque de Santa Margarida.