Esta exposición colectiva reúne unha serie de traballos destacados elaborados polo alumnado das especialidades de deseño gráfico, deseño de interiores, ilustración, fotografía, escultura, dourado e policromía e cerámica da Escola de Arte e Superior de Deseño Pablo Picasso.

A cidade é o elemento común sobre o que xira a temática das obras presentadas neste proxecto no que participan máis de 40 artistas, e ofrécense distintas visións desta realidade: as tribus urbanas imaxinadas, portadas de discos, a protesta do rap, a contaminación visual, os cafés onde se mestura o público e o privado, a soidade, o control etc.

A sala Plataforma14, pertencente a Concellaría de Participación e Innovación Democrática e coordinada polo Centro Municipal de Información Xuvenil, pretende visibilizar a creación realizada polos/as artistas emerxentes da nosa cidade. Toda a información sobre este espazo pode atoparse na web www.coruna.es/cmix/plataforma14.