Da man da contadora de contos e actriz Raquel Queizás, as crianzas de 3 a 8 anos desfrutarán na sala infantil da Biblioteca Ágora de Romaría, un espectáculo de narración oral onde as nosas lendas tradicionais achegan o mundo rural e antigo aos/ás máis pequenos/as, descubríndolles un modo de vida descoñecido para os/as máis deles/delas.

Argumento:

Queliña, unha nena de aldea, ten que rematar de apañar as patacas para que a deixen ir á romaría. Alí quedou coas amizades para brincar, bailar e facer carreiras de sacos. Cara á tardiña, antes de que remate a festa, todas as nenas e nenos buscan a avoa Tareixa para que lles conte lendas, lendas para perder o medo.

Á velliña xa lle falla a memoria e é moi despistada, pero as historias que escoitou de nena, esas non as esquece: lendas de mouras encantadas en fontes, historias de sacos que cantan e lendas que seguen mantendo as crianzas atentas, abraiadas, coa boca aberta, escoitando cómplices.