A Agrupación Astronómica Coruñesa Ío, en colaboración cos Museos Científicos Coruñeses e a Universidade de Santiago de Compostela, presenta o libro «O firmamento animado». O libro é un material didáctico de astronomía dirixido a nenos e nenas de educación infantil e primeiros cursos de primaria. Contén tres apartados: unha guía didáctica con recomendacións para o seu uso, unha guía astronómica para introducirse nos coñecementos básicos de astronomía sobre as constelacións e os contos con ilustracións que nos transportan a unha viaxe máxica polo firmamento, percorrendo 10 constelacións que representan animais visibles desde Galicia.

No acto de presentación participarán as persoas autoras do libro e as coordinadoras do proxecto, que explicarán en detalle o proceso de creación desta publicación e o seu contido.

A asistencia a este acto de presentación, especialmente dirixido a profesorado e profesionais da educación, así como monitores e divulgadores de astronomía, é gratuíta, pero é obrigatoria a inscrición previa a través deste formulario.

«O firmamento animado» é o resultado dun proxecto de "Aprendizaje-Servicio" no que colaboraron a Facultade de Ciencias da Educación da Universidade de Santiago de Compostela e a Agrupación Astronómica Coruñesa Ío, con apoio dos Museos Científicos Coruñeses.