Artesanía

Expertos cheirarvos

A tradición e a calidade son sinónimos da Coruña. Téxtil, cerámica, xoias, bixutería... A cidade atesoura decenas de mestres e mestras artesás con varias xeracións dedicadas a un mesmo oficio.

No balcón do Atlántico atoparás multitude de talleres nos que descubrirás non só variados produtos de calidade, senón unha maneira distinta de entender a creación de pezas únicas. Convidámosche a coñecer aos nosos mellores artesáns cun percorrido polas súas tendas.

Se por algo se caracteriza Galicia, e de maneira especial, a provincia coruñesa, é pola súa espectacular calidade cerámica. A cidade e as súas proximidades acaparan selos de fama internacional, como as pezas de Sargadelos , con taller en Sada (a poucos minutos da Coruña en coche) e unha das súas galerías na coruñesa rúa Real.

A Sargadelos súmanse moitas outras firmas con sede e estudos propios na Coruña. Marcas como Terralume, Branqueta, Arobe Cerámica ou o mestre Pepe Otero mesturan a experiencia dun oficio aprendido das súas raíces coas ganas de achegarse a novos públicos. Non resulta estraño poder gozar do seu traballo en vivo ao deixarse caer polos seus talleres, abertos a visitantes curiosos, e dos seus consellos para unha correcta conservación do produto.

Catálogos únicos

Outro dos puntos fortes da artesanía coruñesa é a creación de pezas de xoiería e bixutería. A Xoiería Obradoiro destaca polo seu trato próximo e por poñer a disposición dos seus clientes xoias con alma propia. Con esta mesma vontade, o taller A Feitura conta cun catálogo único e está aberto a calquera tipo de encarga.

E non só a creación de pezas, que tamén, senón a súa conservación, é a especialidade de artesáns como David Rodriguez, terceira xeración ao mando da Reloxería Nemesio. Ademais de recuperar o tempo perdido nos mecanismos de reloxos estragados, este negocio familiar encárgase do mantemento do espectacular reloxo floral dos xardíns de Méndez Núñez. O seu selo tamén está presente no paso das horas do reloxo da praza de María Pita .

Calidade en cada produto

Alta costura? Artesá e da Coruña. Javier Quintela Atelier, constrúe manualmente tecidos cunha elegancia exclusiva, natural e unha beleza incomparable para noivas e grandes eventos. Tamén o taller Artefíos, ligado a un centro ocupacional e cun tremendo labor de inclusión social baixo o seu nome, elabora teas artesanais dende hai máis de tres décadas.

Tampouco pode quedar no esquecemento o traballo escultórico de Juan Silva, a pintura creativa de Nena Ventura, as creacións en coiro de Chueco, as decoracións de Volta Revolta ou El Tigre de Papel, os encadernados de Códice ou as espectaculares guitarras personalizadas polas mans de Fran Fret Guitars.

E se chegas á Coruña durante o mes de agosto, terás unha oportunidade única de atopar os produtos máis exclusivos na feira Mostrart de Artesanía de Galicia, que se realiza dende 1985 nos xardíns de Méndez Núñez.

Súmaste á artesanía coruñesa?