O Concello rematou os traballos de remodelación do treito de carril bici existente no barrio de Someso, que tiñan o obxectivo de mellorar e ampliar esta infraestrutura e conectala coa rede ciclable que chega ao sector leste do campus universitario de Elviña.

Os traballos centráronse en dar continuidade ao treito de carril bici da avenida da Universidade, construído e habilitado a mediados do ano pasado. Desta forma, ampliouse o percorrido actual bordeando o CIFP de Imaxe e Son, a rotonda da propia avenida e a glorieta da rúa José Pascual López Cortón, conectando este novo treito de carril bici cun xa existente, mais infrautilizado ata a actualidade: o que transcorre en paralelo ás ramplas de acceso e saída do aparcadoiro do centro comercial Espacio Coruña.

Coa súa renovación, o Goberno de Inés Rey mellora este percorrido dándolle unha sintonía coa estética xeral da rede ciclable da cidade, na que predomina o pavimento diferenciado en cor granate, para facilitar a distinción das persoas usuarias con respecto ás zonas de paso das e dos ciclistas. Neste sentido, o Concello tamén acometeu as tarefas de pintura necesarias para a sinalización horizontal dos puntos nos que haxa pasos de preferencia peonil.

Esta intervención forma parte dos compromisos adquiridos polo Goberno de Inés Rey cos veciños e veciñas do barrio de Someso. A folla de ruta para mellorar os espazos públicos do distrito tamén supuxo, meses atrás, a creación da primeira estación de BiciCoruña na propia avenida da Universidade, fronte ao recinto ferial ExpoCoruña.

A mellora e ampliación do percorrido do carril bici de Someso permite que as persoas usuarias do mesmo cheguen ao campus universitario de Elviña. Concretamente, á contorna do pavillón polideportivo da Universidade da Coruña (UDC), a escasos metros do estadio universitario e as pistas de atletismo. A conexión ciclista de Someso co campus de Elviña é posible grazas á senda ciclable que, partindo desde a rúa Lamelas, pasa baixo o viaduto da avenida García Sabell e, a continuación, continúa por baixo da rede ferroviaria na que se atopa o apeadoiro Elviña-Universidade.