O mércores 8 de febreiro, ás 19.30 horas, na Agrupación Cultural Alexandre Bóveda (rúa San Andrés, núm. 36, 1.°) proxectaremos -en colaboración con Valdeorras Infinita- o documental Santoalla.

Dirixido polos estadounidenses Andrew Becker e Daniel Mehrer -e producido pola valdeorresa Cristina de la Torre-, o filme xira arredor da desaparición e do asasinato do neerlandés Martin Verfondern na aldea de Santoalla (Petín) en xaneiro de 2010.

No documental aparece a vida de Martin e a súa muller Margo Pool durante as décadas de 1990, 2000 e 2010. O filme vai entrelazando montaxes de vídeo de arquivo, entrevistas á propia Margo Pool, metraxe de telexornais e outros informativos. Unha mestura de pasado e presente que mostra a progresiva deterioración da relación entre a veciñanza que culmina nun tráxico final.

O documental -que recibiu numerosos premios- estreouse internacionalmente no Festival Internacional de Cinema de Edimburgo o 17 de xuño de 2016.

Á proxección seguirá un coloquio coa súa produtora, Cristina de la Torre.