A Feira de Artesanía Mostrart abriu esta mañá a súa 40ª edición nos Xardíns de Méndez Núñez, con 43 casetas e 70 profesionais da artesanía (55 galegos, 14 de outras comunidades autónomas e un taller francés). O cartel é creación deo ilustrador Javier Fernández Carrera 'Pintu', quen representou o traballo das mulleres artesás. 

O concelleiro de Cultura e Turismo, Gonzalo Castro, a concelleira de Medio Ambiente, Yoya Neira, e a concelleira de Benestar Social, Participación e Igualdade, Nereida Canosa, acompañaron á Asociación Galega de Artesáns na apertura oficial da feira, organizada pola entidade en colaboración co Concello. Castro destacou o evento como unha das citas históricas do verán coruñés: "Cada ano o mellor da artesanía galega volve aos xardíns para mostrar á cidadanía os oficios tradicionais do país, poñendo en valor a nosa cultura e historia como parte indubidable da nosa identidade" sinalou.

Nesta 40 edición volve o programa de obradoiros artesanais 'Oficios ao Sol', con diferentes actividades gratuítas abertas á participación cidadá co obxectivo de dar a coñecer os oficios tradicionais de Galicia. Celebraranse todos os luns e martes durante a celebración da feira, en horario de 11.00 a 14.00 horas e de 18.00 a 21.00 horas, con previa inscrición no stand de información da feira, e están orientados a todas as idades. En total impartiranse oito obradoiros de diferente tipo, dende o 29 de xullo ao 19 de agosto.

Gonzalo Castro lembrou a aposta do Goberno de Inés Rey pola organización de eventos vinculados á artesanía da man da Asociación Galega de Artesáns, coa celebración o pasado mes de abril dos Días Europeos da Artesanía. "A Coruña festexou a efeméride cunha decena de obradoiros gratuítos no Ágora que tiveron un gran seguimento por parte dos máis pequenos e pequenas" lembrou.

Ademais, durante a primeira quincena de agosto, a feira contará con KUKUmobil, unha casa rodante onde a tecedora alemá Andrea Milde que ensinará o seu proxecto téxtil.

Mostrart poderá visitarse ata o vindeiro 25 de agosto, en horario de 11.00 a 14.00 e de 17.30 a 22.00 horas, nos Xardíns de Méndez Núñez. Pódese consultar o listado de expositores da feira nesta ligazón.