O Concello abre hoxe o prazo de inscrición para participar no programa " Do mar á clase e da clase ao mar ", unha actividade de educación ambiental, organizada polo Servizo Municipal de Educación e desenvolvida pola cooperativa galega sen ánimo de lucro 13 Grados, que ten como obxectivo dar a coñecer o medio mariño galego, a súa riqueza e a súa importancia, e demostrar, dun modo dinámico e participativo, como o mar inflúe de forma directa nas nosas vidas e as nosas vidas inflúen na saúde do mar.

A actividade, que está dirixida a alumnos e alumnas de 5.º e 6.º de educación primaria dos CEIP da cidade, inclúe a realización de dous talleres complementarios: unha actividade na aula, na que se percorrerá o mundo submarino galego a través de dinámicas participativas e recursos audiovisuais, e unha actividade na natureza, na que os alumnos e alumnas poderán identificar de primeira man, nunha das praias da cidade, os diferentes rastros que as mareas deixan nesta contorna natural e a súa orixe.

Para inscribirse no programa será necesario cubrir a ficha específica correspondente entre o 17 e o 31 de marzo.

Máis información sobre o programa e os datos de contacto: Do mar á clase e da clase ao mar