A Oficina Municipal de Información ás persoas consumidoras (OMIC) dispón dunha ampla oferta formativa no campo do consumo. Dentro do programa A Coruña Educa presentamos un conxunto de talleres prácticos que supoñen unha actividade dinámica, estimulante e formativa. Todas as actividades están dinamizadas por un equipo docente especializado no campo do consumo responsable e coordinado pola OMIC.

Os diferentes talleres están organizados segundo as distintas etapas educativas; deste xeito, as persoas responsables da docencia poderán escoller aquelas actividades máis adecuadas ao desenvolvemento curricular correspondente.

Ademais, os talleres compleméntanse con charlas para o equipo docente e as familias. Deste xeito, toda a comunidade educativa pode formar parte do proceso de aprendizaxe en valores de consumo responsable.

Duración e localización

Cada taller ten unha duración aproximada de 60 minutos e desenvolverase en horario lectivo. É preceptiva a presenza de persoal docente do centro durante o desenvolvemento da actividade.

No caso de que as sesións do centro educativo sexan de menos de 60 minutos consultar a posibilidade de reservar dúas sesións consecutivas para a correcta realización da actividade.

Os talleres poderanse levar a cabo nos propios centros educativos ou nas instalacións da OMIC da Coruña (r/ Costa da Palloza, 8)

Condicións do programa

- A planificación das actividades levarase a cabo desde a OMIC, xunto coa persoa responsable de coordinar o programa no centro educativo e cuxo contacto figurará no formulario de inscrición.

- O número máximo de participantes por taller é de 25 (30 en secundaria), acompañados de forma preceptiva por persoal do centro educativo.

- No caso de que a demanda supere a dispoñibilidade de prazas outorgaranse as actividades por rigorosa orde de inscrición.

- Unha vez confirmadas as actividades, só será posible realizar cambios se existe unha causa xustificada e hai dispoñibilidade de datas. No caso de que a educadora asista na hora e data acordada e o taller non se poida levar a cabo, este non se reprogramará.

- As actividades están deseñadas para diferentes grupos de idade, polo que se deberá ter en conta no momento de realizar a solicitude para garantir a súa calidade.

- Tendo en conta que algúns centros teñen sesións de menos de 60 minutos de duración, recomendamos reservar dúas sesións de aula para realizar algúns dos talleres. É moi importante consultar isto á hora de fixar os horarios, xa que mellora notablemente a realización da actividade.

- Procuraremos adaptar as actividades ás datas propostas polos centros tendo en conta a demanda e a organización. A data definitiva seralle confirmada ao centro por escrito e procurarase non realizar cambios.

- Para o correcto funcionamento do programa, fixaranse os talleres no menor número de xornadas posibles en cada centro.

- Os talleres poderán ser adaptados para alumnado con diversidade funcional e para grupos de educación especial. Recomendamos especificar as necesidades de cada grupo para que a actividade resulte significativa e motivadora.