O concerto didáctico "Música e evolución" pretende principalmente mostrar e pór en valor o noso patrimonio cultural musical, pero tamén falar da música como manifestación cultural esencial para os humanos. O concerto está orientado para nenos e nenas desde 8 anos de idade, e o discurso pódese adaptar para idades superiores profundando nos temas que se expoñen. Ten unha duración de 70 minutos.

Neste concerto explícanse as últimas teorías científicas sobre o que é a música e o sentido que tivo e ten dentro da nosa evolución como especie. O discurso vai guiado pola analoxía que existe entre a evolución da nosa especie nos últimos catro millóns de anos e o desenvolvemento musical das nenas e dos nenos galegos dentro do noso sitema de cultura, que puidemos reconstruír a partir dos centos de entrevistas realizadas a portadores e portadoras galegas.

Neste concerto mostramos 42 instrumentos musicais galegos diferentes, dos máis de 160 que puidemos documentar en Galicia, simplemente por esta variedade o concerto é xa sorprendente para os mozos e mozas, pois moitos destes instrumentos musicais sonlles completamente descoñecidos.

Por outra banda, este concerto contén unha fonda revisión do papel esencial que as mulleres xogan na música, na cultura e organización social humana e expóñense, así mesmo, a teoría da orixe dos instrumentos musicais na cultura infantil, algo que sorprende sempre aos nenos e nenas. Partindo de feitos biolóxicos como os sons intrauterinos, as diferenzas físicas e condutuais entre homes e mulleres ou o proceso de selección sexual, conseguimos explicar feitos musicais da nosa tradición, por exemplo que as mulleres sexan as principais cantoras, a organización semanal de varias festas nas aldeas de antes, ou mesmo o uso principalmente masculino da gaita de fol na tradición.

No concerto faise unha revisión da nosa música dende unha perspectiva de xénero que leva os/as pequenos/as a observar e entender a orixe biolóxica das diferenzas entre homes e mulleres, dos diferentes comportamentos musicais e a entender a necesidade de alcanzar unha igualdade real.