O programa "Cinema na escola" persegue converter a cada alumno/a en verdadeiro o protagonista da aprendizaxe, xa que cada participante é capaz de desenvolver os seus talentos, traballar en equipo, desenvolver a súa creatividade, aprender e expresar emocións e contar historias.

REQUISITOS

• Alumnado de 5º e 6º de Primaria, de ESO e FP Básica, de centros educativos públicos e concertados do municipio da Coruña.
• A elaboración da curtametraxe polo alumnado participante realizarase utilizando como ferramenta os teléfonos móbiles.
• Cada centro poderá inscribir, como máximo, dous equipos.
• Cada equipo estará coordinado por un/unha docente.
• As curtametraxes terán que ser en lingua galega e deben entregarse no mes de abril.
• O programa poderá ser suspendido se non hai un mínimo de 20 centros inscritos.

FORMACIÓN

Os centros que soliciten participar recibirán un módulo de formación orientado ao profesorado que coordine a actividade, acceso a material exclusivo "videotutoriais "e acceso directo ao equipo técnico para resolver dúbidas ao longo de toda a fase creativa.

O módulo de formación constará de dúas sesións de 90 minutos en liña, onde se abordarán aspectos como: a idea, a sinopse, o guión literario, técnicas de gravación, o casting, ensaios, plan de rodaxe, edición e montaxe.

Terminada a fase de formación en liña haberá unha segunda fase de formación individual presencial e de seguimento do proxecto, onde os equipos poderán comezar o traballo de guionización, gravación, edición e montaxe final das curtametraxes.

PREMIOS

Designarase un Xurado (composto por, polo menos, tres membros especialistas na materia) que valorará e propoñerá unha selección dos proxectos finalistas como candidatos a cada un dos premios propostos; que serán entregados nunha gala final por cada categoría.

Os premios que se van conceder en cada categoría son os seguintes:

• Mellor curtametraxe.
• Mellor representación feminina.
• Mellor representación masculina.
• Mellor guión.
• Mellor fotografía.
• Mellores efectos visuais.
• Mellor edición de vídeo.
• Mellor edición de audición.

Tamén poderán outorgar ata 3 mencións: valores, comedia e esforzo, para favorecer que todos os centros poidan sentirse protagonistas nas Galas finais.

Ademais entregarase un premio do público para a curtametraxe máis valorada en redes sociais, que se poderán visualizar na nosa canle de Youtube.