A corresponsabilidade implica unha mellor conciliación da vida persoal, familiar e laboral e, por iso tamén, unha repartición equilibrada das tarefas domésticas; isto require involucrar os homes na corresponsabilidade da vida laboral, familiar e persoal para que se dea unha repartición equitativa das responsabilidades e unha mellor distribución dos seus tempos.

Este é un cambio importante que necesita reforzarse desde a sensibilización e educación en igualdade para ir eliminando os roles e estereotipos tradicionais que nos atrapan, a homes e a mulleres en tarefas e funcións diferentes colocándonos en posicións de desigualdade económica e social.

Desde a Concellería de Igualdade e Diversidade queremos contribuír a unha maior corresponsabilidade no municipio, ampliando, na medida do posible, a oferta de servizos sociocomunitarios para atender as necesidades básicas favorecendo o cambio de actitudes necesario para unha repartición de responsabilidades en equidade.

A Administración Local e a cidadanía son corresponsables no proceso de construción dun novo modelo de sociedade.