10 de novembro de 2022
Os corais que se empregan no proxecto proceden da fragmentación de colonias de Dendrophyllia cornigera que forman parte da colección biolóxica do Aquarium Finisterrae.
O Aquarium Finisterrae participa desde o ano 2019 no proxecto europeo iAtlantic, que estuda, entre outros, os efectos do cambio climático sobre os ecosistemas atlánticos. O traballo que se está a realizar no acuario coruñés consiste nun complexo experimento de 12 meses de duración que permitirá coñecer o efecto combinado de diversos factores de tensións, produto do cambio global -o quecemento da auga do mar, a acidificación e a desoxigenación da mesma-, nas poboacións do coral de profundidade Dendrophyllia cornigera, coñecida como coral amarelo ou xirieira. É un coral de augas frías que habita diversas zonas do Mediterráneo e do Atlántico, incluídas as augas de Galicia.
As comunidades de corais de augas frías forman estruturas tridimensionais complexas que serven de hábitat para numerosas especies e constitúen un lugar de protección fronte aos depredadores. Ademais, os arrecifes submarinos que forman os corais de augas frías actúan como lugar de cría de moitas especies de peixes e invertebrados e desde o ano 2009 están considerados pola FAO como Ecosistemas Mariños Vulnerables, xa que as especies que os conforman son na súa maioría moi lonxevas, con taxas de crecemento moi baixas e moi sensibles e vulnerables ás actividades humanas.
Desenvolvemento do estudo
Persoal investigador da Universidad de Barcelona e do Centro Oceanográfico de Xixón (IEO-CSIC) estivo estes días no Aquarium Finisterrae realizando, xunto con membros do equipo científico do acuario coruñés, diferentes medidas dos corais de profundidade que son os organismos diana que estuda o proxecto.
Para a realización do estudo está a empregarse un total de 24 acuarios de pequeno volume. En cada un deles criáronse 6 fragmentos de D. cornigera, o que supón un total de 144 fragmentos involucrados no experimento. Os corais están fixados a unha base de metacrilato que permite extraelos dos tanques experimentais cando é necesario para realizar medidas dos mesmos de forma individualizada.
Estes días están a se realizar medidas de peso e consumo de osíxeno, que son as variables resposta que se están investigando no marco deste experimento co fin de pescudar se a combinación de axentes de tensións afecta ao crecemento dos corais e ao seu metabolismo.
As condicións ambientais de cada un dos acuarios experimentais obtéñense preparando auga de diferentes tipos que simulan diferentes escenarios climáticos actuais e futuros, tendo en conta para estes últimos as predicións do IPCC (Panel Internacional Para o Cambio Climático), así como o coñecemento co que actualmente temos dos límites fisiolóxicos desta especie de coral.
Aquarium Finisterrae. Paseo Alcalde Francisco Vázquez 34. 15002 A Coruña
15 de agosto de 2024
A instalación conta cunha piscina de illamento con subministración continua de auga salgada entre outras novidades
23 de xullo de 2024
Un vídeo divulgativo amosa como se realiza a captura no mar e o seu traslado ao acuario coruñés.
16 de xullo de 2024
«Fotografías da natureza 2024» contén as imaxes premiadas na última edición de European Wildlife Photographer of the Year.
Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible