Non podes visitar A Coruña e non probar os seus churros con chocolate de Bonilla ou de El Timón, presentes en almorzos e merendas, e que dividen os corazóns dos coruñeses á hora de elixir cales son os mellores.

Se es dos que che perde un doce máis que calquera outra cousa no mundo e saboréalo sen remorsos, achégate a algunha das nosas clásicas confeiterías, artesanais e de longa tradición, como Glaccé ou Berna, e deléitate coas súas vitrinas repletas de felicidade: caracolas, bombas de crema, milfollas, brazos de nata con fresas, tortas, pasteis e pastas de té. Ou eses deliciosos roscóns de Reis, de fama nacional, zumentos, con azucre, crema e froita cristalizada, que provocan longas fileiras no tempo do Nadal. Ah! E non nos esquezamos dos delicados pasteis en miniatura da confeitería Paris.

Adozar a túa viaxe non será tarefa difícil. Existen tamén mestres pasteleiros que agregan novos sabores, formas e cores á oferta doce. Mostra desta gran pericia atoparala en establecementos como Habaziro, con marabillosos croissants de abelá, pistacho ou chocolate, tortas, tartaletas, biscoitos e cookies. Ou en Doriel, virtuoso do chocolate e á hora de realizar creativas elaboracións que deixan abraiados os seus clientes. Un bo café como acompañamento será a parella imbatible.