A alcaldesa, Inés Rey, visitou esta mañá o barrio de Xuxán coa ministra de Vivenda e Axenda Urbana, Isabel Rodríguez, e a conselleira de Vivenda e Planificación de Infraestruturas, María Martínez Allegue, onde se está a construír un edificio de 40 vivendas de protección pública financiadas con fondos PRTR. Rey anunciou que o Concello iniciará esta semana a consulta previa da ordenanza de reguladora das vivendas de uso turístico. Habilitarase na web municipal o formulario público para recoller suxestións cidadás antes da tramitación da nova ordenanza: "Co obxectivo de que toda a cidadanía poida facer as súas achegas", sinalou.

Con respecto á vivenda tensionada, a rexedora criticou a falta de vontade da Xunta de Galicia para aplicar a normativa estatal: "Dispoñendo das competencias e de todos os datos, deberían aplicar a norma sen lles derivar a responsabilidade aos concellos". Segundo datos do propio Observatorio de Vivenda de Galicia, no seu informe de Zonas Tensionadas por Concellos, recoñece que a cidade ten 9 dos seus 12 distritos en situación de ser declarados zonas tensionadas. Con todo, trasladou que a Administración local responderá aos requisitos que pide o Goberno autonómico "para que deixen de poñer escusas e se tomen en serio a política de vivenda".

Segundo cálculos do Ministerio de Vivenda e Axenda Urbana, se a Xunta atendese as peticións do Concello da Coruña para que se declare zona tensionada, os coruñeses e coruñesas aforrarían unha media de 400 euros ao ano no pago do alugueiro.

Impulso ao barrio de Xuxán

Rey reivindicou o impulso brindado polo seu Goberno ao antigo Ofimático: "Desde o Concello investimos 11,5 millóns de euros para a urbanización do barrio co obxectivo de dotalo de calidade urbana" explicou. Así mesmo, lembrou que o pasado mes de xuño se licitaron as obras de construción dun edificio de 50 vivendas na parcela Z-37, soar de titularidade municipal e destinado a alugueiro social. O investimento total será de 10,2 millóns, dos cales 2,4 proceden de fondos Next Generation.

A actuación enmárcase no Plan de vivenda 2024-2030 posto en marcha polo Goberno local como resposta á inacción da Xunta de Galicia nos últimos anos: "A Coruña conta na actualidade con máis de 2.400 demandantes de vivenda protexida rexistrados e ao mesmo tempo unha das cidades con menos vivenda pública". O plan recolle obxectivos como o desenvolvemento de polígonos para a construción de vivenda en Visma e Xuxán, a aposta pola vivenda en réxime de alugueiro, a posta en marcha dunha oficina de asesoramento a inquilinos ou a rehabilitación de edificios.

Ao remate da visita ao barrio de Xuxán desplazáronse ao Centro Integrado de Formación Profesional de Someso para coñecer a formación impartida en materia de construcción, xunto co conselleiro de Presidencia, Diego Calvo, e o concelleiro de Urbanismo e Rehabilitación, Francisco Díaz Gallego.