Cada vez somos máis conscientes da importancia de coñecer e coidar o lugar no que vivimos e existe un interese renovado por vivir a natureza dun modo diferente. Desde 13 Grados, cooperativa galega sen ánimo de lucro que desde 2020 leva a cabo un labor de conservación e divulgación do medio mariño en Galicia, propuxéronse abrir unha xanela desde a que asomarnos á vida baixo o mar e concienciar sobre o noso papel na súa conservación. Non se pode conservar o que non se coñece, de aí a importancia de descubrir este mundo paralelo que se esconde alén da superficie.

Co proxecto "Do mar á clase e da clase ao mar" búscase que o alumnado de 5º e 6º de primaria coñezan o medio mariño galego, a súa riqueza e a súa importancia, e sexan partícipes da súa conservación.

A participación no proxecto inclúe a realización de dous talleres complementarios:

Actividade na aula: mergullando desde a clase

Actividade na natureza: ondas de plástico

Dinámicas complementarias

Ademais das dinámicas participativas que se desenvolven en cada unha das actividades, dedícase parte dos talleres para crear ferramentas útiles para que o centro educativo poida replicar a actividade ou crear novas accións educativas dentro da conservación mariña a partir dos contidos e recursos abordados. Este aspecto compleméntase co seguimento desta continuidade a través dunha reunión en liña co centro educativo no mes de xuño.

Unha vez finalizados os talleres nos diferentes centros, compartirase o traballo e as accións realizadas en cada un deles para facer unha posta en común dos resultados a través dunha memoria final e ter unha visión global do coñecemento do medio mariño e as propostas de divulgación e conservación que foron levadas a cabo.