Coa publicación, o mércores 20 de novembro, no Boletín Oficial da Provincia (BOP) da Coruña, do extracto da convocatoria do programa "Bolsas norteamérica 2025-2026", ábrese, desde o 21 de novembro e ata o 4 de decembro (ambos os días incluídos), o prazo de solicitude das bolsas.

As Bolsas norteamérica 2025-2026 ofertan un mínimo de 25 prazas para que as alumnas e alumnos dos centros educativos coruñeses que cursan 4º de ESO este ano poidan darlle continuidade á súa formación en América do Norte durante o curso 2025-26, no seu primeiro ano de Bacharelato.

O primeiro paso para presentar a solicitude será cubrir unha ficha específica de inscrición a través da web de Educación, que deberá presentarse posteriormente, acompañada por toda a documentación requirida, a través dos rexistros oficiais do Concello.

Máis información na páxina do programa: Bolsas Norteamérica 2025-2026 .