Dirixida a grupos de teatro escolar dos centros educativos do Concello da Coruña dos niveis de educación infantil, primaria e secundaria, a 'Mostra de Teatro Escolar' celebra esta ano a súa XXXIV edición. Este programa busca potenciar, promover e difundir a actividade teatral feita por escolares entre o alumnado dos centros educativos do concello.

A edición 2024/2025 do programa reúne a un total de 25 grupos teatrais pertencentes a 16 colexios e institutos da cidade, distribuídos en 3 categorías educativas: educación infantil (2 grupos), educación primaria (17 grupos) e educación secundaria e bacharelato (6 grupos).

As actuacións terán lugar tanto en horario de mañá como de tarde e consistirán en representacións entre centros, o que se lle permitirá ao alumnado compartir experiencias e coñecementos escénicos coa comunidade educativa da cidade. O cronograma pode consultarse a través da seguinte ligazón: Cronograma da Mostra de Teatro Escolar 2024/2025

O programa finalizará coa representación das obras gañadoras e a entrega de premios o venres 6 de xuño, ás 17.00 horas, no Fórum Metropolitano.