As liñas comúns de traballo pasan pola recuperación ambiental e da biodiversidade da ría do Burgo, a coordinación de actuacións de políticas de desenvolvemento territorial baseadas en plans urbanísticos conxuntos, unha visión compartida da xestión de servizos, e unha estratexia de innovación conxunta.

Como manifestación institucional amosa o compromiso das distintas corporacións asinantes (e aquelas que queiran adherirse posteriormente) por impulsar a creación da AMAC mediante a aprobación no Consello da Xunta de Galicia dun anteproxecto de lei, para continuar posteriormente no Parlamento de Galicia cunha normativa específica, a Lei da área metropolitana, que partiría inicialmente dos concellos, mais que sumará tamén os partidos políticos, a Deputación e a Xunta.

A sinatura desta Declaración de María Pita foi aprobada nos correspondentes plenos dos concellos asinantes e, ademais, obtivo o apoio de entidades, organismos e de cidadáns e cidadás da comarca, o que demostra o interese que esperta.