A Casa das Ciencias renova un dos seus módulos estrela, a incubadora de pitiños, para facela máis espazosa e accesible aos visitantes. A nova instalación está especialmente adaptada para facilitar que os nenos e nenas de menor idade poidan contemplar o proceso do nacemento de crías de galiña, a través dun gran vidro situado a pouca altura. O novo deseño tamén mellora as condicións de temperatura, humidade e hixiene que precisan os animais.

A incubadora de pitiños formou parte da Casa das Ciencias na exposición temporal «Amarelo por natureza» de 1997, mais a partir de entón decidiuse manter de forma permanente debido ao seu interese didáctico e as peticións do público. A incubación de pitiños require de 21 días a unha humidade e temperatura concretas para que a cría se desenvolva por completo e logre rachar a casca do ovo. Tras un breve descanso, os pitiños comezan a camiñar e son capaces de alimentarse e beber de maneira completamente autónoma. Os pitiños que nacen na Casa das Ciencias repártense entre granxas locais da provincia da Coruña a través dunha empresa de educación ambiental.