Na etiquetaxe de todo produto alimenticio figurará a data de duración mínima ou, se é o caso, a data de caducidade.

A data de duración mínima é a data ata a que o produto mantén as súas propiedades específicas en condicións de conservación adecuadas, expresarase mediante as lendas:

a) "Consumir preferentemente antes do...", cando a data inclúa a indicación do día.

b) "Consumir preferentemente antes do fin de...", nos demais casos.

A data estará composta pola indicación clara e en orde do día, o mes e o ano. Non obstante nos produtos:

• Cuxa duración sexa inferior a tres meses bastará indicar o día e o mes.
• Cuxa duración sexa superior a tres meses pero inferior aos dezaoito, bastará indicar o mes e o ano.
• Cuxa duración sexa superior aos dezaoito meses, bastará indicar o ano.

No caso dos produtos microbioloxicamente moi perecedoiros, por exemplo os iogures, natillas ou similares e que por iso poidan supoñer un perigo inmediato para a saúde humana despois dun curto período de tempo, a data de duración mínima cambiarase pola data de caducidade, expresada mediante a lenda "data de caducidade" seguida da data en día, mes e, eventualmente, ano. As ditas informacións completaranse cunha descrición das condicións de conservación que terán que respectarse.