Descrición da actividade

¡Ssszzziúuu! É a expresión máis auténtica e natural dunha peonza, é ese son a medio camiño entre o zumbido, o asubío e o murmurio, que escoitaremos cando unha peonza sae da nosa man e atravesando o aire, xusto antes de poñerse a bailar. Ese será o presaxio de que algo grande e fermoso vai pasar. Porque cando unha peonza baila, tamén o fan a fantasía, a imaxinación e a creatividade de quen a lanzou.

Esta mostra é unha invitación non só ao coñecemento deste xogo popular e tradicional, senón tamén á revitalización do mesmo e das emocións e sentimentos que provoca.

¿Que poderás atopar nesta exposición?

• 47 fotos artísticas de peonzas.
• 400 peonzas de moi diversas partes do mundo.
• 8 paneis informativos sobre o xogo da peonza e as súas derivacións no mundo da pintura, da ciencia, da publicidade e do cinema.
• Libros e outros obxectos da vida cotiá que ten relación coas peonzas.
• Taller de perinolas.

Esta exposición é a culminación do proxecto "Ssszzziúuu", que naceu do libro homónimo publicado no ano 2022, do que son autores Lestonnac Ibáñez (fotógrafa) e Luís Ramas (profesor e coleccionista de peonzas).