*Actualmente comparte espazo coa EIM Luís Seoane.

Finalizados os períodos de reserva e traslado de praza, publícanse a continuación as prazas vacantes para o curso 2025-2026:

Este documento inclúe toda a información relativa ao proceso de admisión na REIM para o curso 2025-2026: Bases do proceso de admisión na REIM 2025-2026 .

Establécense dúas modalidades de novo ingreso:

CARÁCTER PREFERENTE:

Terán carácter preferente as solicitudes de prazas cuxas circunstancias sexan as seguintes:

• As correspondentes aos fillos e fillas do persoal que presta servizos na escola, de conformidade co sinalado no convenio laboral de aplicación. O convenio actual recolle ese dereito como mellora social. A empresa xestora deberá asumir, por tanto, o custo destas prazas, de conformidade co artigo 72 do citado convenio (BOE núm. 178 do 26.07.2019). O importe será descontado á empresa nos aboamentos mensuais.
• Os nenos e nenas que se van matricular por primeira vez e que conten cun irmán ou irmá escolarizado/a para o curso 2025-2026 nunha escola da REIM.
• As consideradas de urxencia social. Enténdese por prazas de urxencia social aquelas nas que concorran as seguintes situacións:
  • Menores tutelados/as ou en situación de garda por parte da Administración autonómica competente.
  • Fillas e fillos de mulleres que estean en centros de acollida ou sexan vítimas de violencia de xénero.
  • Menores que se atopen nun contexto sociofamiliar de risco social e que requiran unha intervención inmediata.

Documentación:

Todas as situacións enumeradas anteriormente deberanse acreditar documentalmente para xustificar o carácter preferente mediante a presentación da seguinte documentación:

• Fillas/os do persoal que presta servizos na escola:
  • Certificación da empresa que xestiona a escola infantil na que se sinale que o/a solicitante é persoal da empresa, que non superan os límites de reserva establecidos no artigo 72 do convenio laboral e que esta asume o custo da praza.
• Nenos e nenas que se matriculen por primeira vez e conten cun irmán ou irmá matriculado/a na escola no curso escolar 2025/2026:
  • Certificado da escola que acredite esta situación.
• Urxencia social:
  • Para menores tutelados/as ou en situación de garda por parte da Administración autonómica:
    • Resolución administrativa da situación de garda/tutela expedida polo órgano competente da Administración autonómica.
  • Para fillos e fillas de mulleres que estean en centros de acollida ou sexan vítimas de violencia de xénero, segundo o artigo 5 da Lei 11/2007, do 27 de xullo, galega para a prevención e o tratamento integral da violencia de xénero.
    • Certificación da orde de protección ou da medida cautelar, ou testemuño ou copia autentificada pola secretaria ou o secretario xudicial da propia orde de protección ou da medida cautelar.
    • Sentenza condenatoria na orde penal por homicidio ou asasinato das fillas ou fillos da muller, así como de calquera outra persoa estreitamente unida a ela, por quen sexa ou fose o seu cónxuxe ou por quen mantivo con ela unha relación análoga de afectividade aínda sen convivencia ou calquera outro documento que acredite a violencia vicaria; así como as demais sentenzas de calquera orde xurisdicional que declaren que a muller sufriu violencia en calquera das modalidades definidas nesta lei.
    • Certificación e/ou informe dos servizos sociais e/ou sanitarios da Administración pública autonómica ou local.
    • Certificación dos servizos de acollida da Administración pública autonómica ou local.
    • Informe do Ministerio Fiscal que indique a existencia de indicios de violencia.
    • Informe da Inspección de Traballo e da Seguridade Social.
    • Calquera outras que se establezan regulamentariamente.
  • Para menores que se atopen nun contexto sociofamiliar de risco social e requiran unha intervención inmediata:
    • Informe do técnico/a do sistema de servizos sociais ou outros sistemas, no que se valore a urxencia social e se propoña como recurso idóneo para a atención do/a menor a escola infantil municipal, de maneira motivada e coherente cos obxectivos da intervención social proposta.

Nas solicitudes de novo ingreso de carácter preferente de alumnado con necesidades específicas de apoio educativo (NEAE) deberase acreditar a concorrencia desta circunstancia.

Esta documentación deberase completar coa indicada no apartado "Lugar de presentación e documentación".

CARÁCTER ORDINARIO

As restantes solicitudes de novo ingreso que non teñan carácter preferente serán obxecto de baremación para a asignación de prazas, segundo o procedemento que se establece nos apartados seguintes.

Serán requisitos para solicitar praza na REIM:

1. Ter unha idade mínima de 3 meses o día de comezo do curso escolar e non ter cumpridos os 3 anos o 31 de decembro de 2025. Con todo, poderanse eximir do límite de idade dos 3 anos os nenos e as nenas con necesidades específicas de apoio educativo, de acordo coa normativa vixente.
2. Para solicitar praza de novo ingreso será necesario que a/o menor estea empadroada/o con algunha das persoas proxenitoras ou, se for o caso, co/a titor/a legal. Para determinar o domicilio tomarase como referencia o do/a solicitante.

1. En primeiro lugar, obterán unha praza nas escolas solicitadas os/as nenos/as empadroados/as no Concello da Coruña con algún dos seus proxenitores ou algunha das súas proxenitoras ou representantes legais.
2. En segundo lugar, no caso de existiren prazas vacantes, terán preferencia os/as menores empadroados/as noutros municipios, sempre que algún dos seus proxenitores ou algunha das súas proxenitoras ou representantes legais teña o seu posto de traballo no termo municipal da Coruña.
3. En terceiro lugar, se aínda quedasen vacantes, poderán optar os/as nenos/as doutros concellos.

Despois de aplicar o criterio de prioridade e só se existisen máis solicitudes que vacantes, procederase a baremar as solicitudes de acordo cos criterios que se indican a continuación.

A baremación será única para todas as escolas e levarase a cabo tendo en conta os seguintes criterios:

A) Situación sociofamiliar. Puntuarase:

B) Situación sociolaboral. Puntuarase:

Situación económica

A puntuación asignada na situación económica da unidade familiar só se terá en conta cando exista un empate entre varias solicitudes de acordo coa puntuación obtida nas situacións sociofamiliar e sociolaboral.

Empate na puntuación

Se, despois de aplicar tamén o baremo da situación económica, persistise o empate entre varias solicitudes, resolverase a asignación de praza tendo en conta o resultado do sorteo público das dúas primeiras letras de prioridade, tanto para o primeiro apelido como para o segundo apelido. O dito sorteo realizarase no Servizo Municipal de Educación antes do inicio do período de solicitude de praza.

A data e a hora da realización do sorteo publicarase na web municipal (www.coruna.gal/educacion), como mínimo, un día antes da súa realización.

O resultado do sorteo publicarase tamén nesta mesma páxina web, como máximo dentro dos tres días seguintes á súa realización.

En cumprimento do establecido no artigo 7, apartado 7.3.b., das Bases reguladoras do proceso de admisión na Rede de Escolas Infantís Municipais (REIM) para o curso 2025-2026, realizouse o sorteo público o día 21 de marzo de 2025, ás 09.30 horas, no Servizo Municipal de Educación (praza de María Pita, s/n, 3.º piso).

Para os efectos da resolución do desempate na puntuación final no proceso de admisión nas Escolas Infantís Municipais para o curso 2025-2026, conforme ao resultado do sorteo, as letras de prioridade que afectan ao primeiro apelido son as letras "I" e "F"; así mesmo, afectan ao segundo apelido as letras "K" e "B".

Presentarase unha única solicitude, pedindo por orde de prioridade as escolas polas que se opta. Nesta solicitude poderán solicitar ata un máximo de dúas escolas. A adxudicación de prazas realizarase tendo en conta a escola infantil seleccionada como primeira opción.

A adxudicación dunha praza na escola indicada como primeira opción implicará a aceptación da súa matriculación (salvo renuncia expresa) e a eliminación da lista de espera na opción non adxudicada.

O alumnado incorporarase á escola o día de comezo do curso escolar, ou o día seguinte á finalización do prazo de matriculación, no caso das convocatorias extraordinarias, salvo causas xustificadas e valoradas polo Servizo Municipal de Educación.

A adxudicación dunha praza na escola indicada como segunda opción permitirá manter a situación en lista de espera na escola non adxudicada e elixida como primeira opción. Para a adxudicación das prazas atenderase ao disposto, en primeiro lugar, nos apartado Criterios de prioridade e, se existen máis solicitudes que vacantes, atenderase a continuación ao previsto nos apartados Criterios de baremación e Criterios de desempate.

As persoas interesadas deben facer unha inscrición en liña na web municipal (www.coruna.gal/educacion) a través da ficha específica "Solicitude de praza na escola infantil 2025-2026".

Acceso a "Solicitude de praza na escola infantil 2025-2026": https://edu.coruna.gal/infantil/solicitude/solicitude_publica_reim/

Despois de cubrir e completar a dita ficha, o sistema elabora un xustificante (documento PDF) que se envía ao correo electrónico facilitado. Este documento en PDF, denominado ficha de preinscrición, conterá un número de identificación (IDE) que será o de referencia para cada expediente no procedemento. Dado o seu carácter de preinscrición, este xustificante é só un trámite previo necesario para poder formular validamente a solicitude da praza propiamente dita e non ten en ningún caso a consideración de solicitude da praza nunha escola infantil para o curso 2025-2026.

Unha vez recibida a dita ficha de preinscrición deberá imprimirse e ser asinada polos dous proxenitores ou polas dúas proxenitoras ou titores/as e, xunto ao resto da documentación requirida nestas bases, deberá presentarse no rexistro electrónico do Concello da Coruña (https://sede.coruna.gob.es), no Rexistro Xeral do Excmo. Concello da Coruña ou a través de calquera outro medio dos establecidos no artigo 16 da Lei 39/2015, do 1 de outubro, do procedemento administrativo común das administracións públicas.

DOCUMENTACIÓN

Para as solicitudes de novo ingreso con carácter preferente e con carácter ordinario, as persoas interesadas deberán achegar coa solicitude a seguinte documentación:

• Xustificante de confirmación da preinscrición en liña asinado polas dúas persoas proxenitoras. Só será necesaria unha sinatura no caso de familias monoparentais/monomarentais ou de persoas proxenitoras que teñan a patria potestade en exclusiva.
• No caso de non autorizar na preinscrición en liña a consulta do DNI/NIE, a copia do anverso e reverso do DNI/NIE en vigor.
• No seu caso, o pasaporte ou Certificado de Rexistro de Cidadán da Unión. Neste caso deberá presentarse xunto co documento de identidade do país de orixe.
• Copia do libro de familia, certificado de nacemento ou, na súa falta, outro documento que acredite oficialmente a filiación do/a menor.
• Se aínda non naceu o/a menor para quen se solicita a praza, certificado médico que indique a posible data prevista para o seu nacemento. Nestes casos a condición de nado/a deberá acreditarse no momento de realizar a matrícula na escola asignada.
• No caso de separación ou divorcio, sentenza ou documentación acreditativa conforme o/a menor está a cargo da persoa solicitante ou ben goza de custodia compartida.
• No caso de alumnado con necesidades educativas especiais, deberá acreditarse a concorrencia desta circunstancia.
• No caso de menores empadroados/as fóra do Concello da Coruña, presentarase o certificado de padrón onde se acredite que o/a menor reside con algunha das súas persoas proxenitoras.
• No caso de non autorizar na preinscrición en liña a consulta dos datos tributarios deberá achegar a/s declaración/s da renda dos membros da unidade familiar correspondente/s ao exercicio 2023.
• Para os casos nos que non sexa posible a obtención de datos económicos para ambos ou algunha das persoas proxenitoras (non constar dados de alta no censo de contribuíntes, persoas sen DNI/NIE ou persoas sen exercicio profesional ou laboral en España dende a súa chegada ao país) será obrigatorio que se presente unha declaración responsable, que deberá estar asinada polos/as proxenitores/as afectados/as por esta circunstancia. Cada persoa proxenitora deberá facer constar os seus ingresos obtidos nos últimos doce meses, así como a súa procedencia. Xunto coa declaración xurada deberá entregar a súa vida laboral e, no caso de traballar en España, unha copia de:
  • As nóminas dos últimos seis meses anteriores á data da solicitude, no caso de traballadores/as por conta allea.
  • As declaracións tributarias trimestrais relativas ao período anterior, no caso de traballo por conta propia.
• As persoas empadroadas no Concello da Coruña, de non autorizar a consulta do padrón na preinscrición en liña, deberán entregar un certificado de padrón que acredite a residencia no concello do/a solicitante con algunha das persoas proxenitoras.

A falta de presentación dalgún dos documentos dentro do prazo de presentación da solicitude e de corrección ou emenda supoñerá a exclusión do proceso.

OUTRA DOCUMENTACIÓN PARA OS EFECTOS DE VALORACIÓN

• No caso de familias monoparentais/monomarentais, o certificado vixente no prazo de presentación de solicitudes expedido pola Dirección Xeral de Familia, Infancia e Dinamización Demográfica ou o órgano competente da Administración autonómica.
• As solicitudes de novo ingreso con carácter preferente deberán presentar a documentación acreditativa do cumprimento dalgún dos requisitos sinalados para ter dereito ao ingreso preferente, tal e como se recolle no apartado PROCESO DE ADMISIÓN PARA OS NOVOS INGRESOS (CARÁCTER PREFERENTE E ORDINARIO). En caso de non achegala, a solicitude será valorada con carácter ordinario.
• No caso de non autorizar na preinscrición en liña a consulta do grao de discapacidade, débese presentar o certificado expedido polo órgano competente do grao de discapacidade.
• Resolución do recoñecemento do grao de dependencia do/a menor ou de recoñecemento dalgunha medida de apoio para o exercicio da súa capacidade xurídica.
• No caso de non autorizar na preinscrición en liña a consulta do certificado de vida laboral, débese achegar o dito certificado actualizado na data de presentación de solicitudes. No caso de traballadores/as por conta propia, aínda que se autorice a consulta deben presentar o recibo de pago da cota da Seguridade Social ou da correspondente mutualidade do mes anterior ao período da solicitude.
• Nos casos de excedencia laboral por coidado de fillos das persoas proxenitoras ou titoras, para obter a puntuación no apartado de situación sociolaboral, ademais de autorizar a consulta ou presentar o certificado de vida laboral actualizado na data de presentación de solicitudes, deben presentar a documentación correspondente que acredite que a data de finalización da excedencia coincide, como máximo, co mes de incorporación do/a menor á escola infantil.
• No caso de non autorizar na preinscrición en liña a consulta do certificado de familia numerosa, débese presentar o certificado vixente na data de presentación de solicitudes expedido polo órgano competente.
• Os/as residentes noutros municipios que traballen no Concello da Coruña, deberán achegar un certificado de empresa no que conste que a persoa traballa nun centro de traballo con domicilio na Coruña.

A falta de presentación dalgún dos documentos recollidos neste apartado dentro do prazo de presentación da solicitude e emenda supoñerá a non valoración no apartado correspondente.