O programa proporcionaralle apoio aos centros participantes mediante un asesoramento por especialista na materia, e ofrecerá premios incentivadores que priman as mellores iniciativas tanto do alumnado participante como dos centros educativos.

Para realizar a valoración dos proxectos presentados e seleccionar aos gañadores o concello contará coa colaboración de persoas expertas en educación e comunicación científica e persoas mozas con experiencias en actividades científicas.

TEMÁTICA:

Auga Limpa, Futuro Sostible. Esta edición de Imaxina é unha oportunidade para que os estudantes desenvolvan competencias científicas e sociais á vez que achegan solucións creativas a un dos maiores desafíos do noso tempo: garantir o acceso universal a auga limpa e saneamento. Coa súa participación, os mozos non só aprenderán sobre a ciencia da auga, senón que tamén se comprometerán activamente na construción dun futuro máis sostible e xusto para todos.

DESENVOLVEMENTO:

O concurso distribúese nas seguintes fases que van do mes de novembro de 2024 ao mes de abril de 2024.

Fase I.- Preparación do proxecto

De novembro do 2024 a marzo de 2025. Xornada presencial ou telemática sobre a temática proposta para os proxectos: xoves 7 de novembro de 2024, ás 17.00 h, na Domus. Titorización e asesoramento durante a elaboración dos traballos por parte do persoal especialista e persoal dos Museos Científicos Coruñeses, a través de correo electrónico e outros medios telemáticos.

Fase II.-Presentación da memoria final

O prazo de presentación da memoria final terminará o 31 de marzo de 2025 debendo entregarse en formato PDF a través do correo electrónico imaxina@coruna.gal. A memoria debe ser orixinal, en galego, inédita e innovadora e conter: Título do proxecto. Nomes, apelidos e DNI do alumnado participante. Nomes, apelidos e DNI do profesor que liderou o reto. Hipótese, materiais, resultados e conclusións

Deberanse entregar tamén imaxes, táboas, gráficos, fotografías ou calquera outro elemento que dea soporte á memoria presentada. A memoria deberá presentarse usando a letra Arial 11 e non poderá superar as 20 páxinas. Quedarán excluídas as memorias que non se axusten a estes requisitos.

Fase III.- Valoración da memoria

A valoración das memorias realizarase coa posta en común das valoracións dun xurado sénior composto por un mínimo de 3 membros, todas elas persoas de recoñecido prestixio na educación e a comunidade científica, actuado como secretario un/unha técnico/a do Servizo Municipal de Educación. Este xurado seleccionará, baseándose nas memorias presentadas, os proxectos que pasarán á final e que participarán na Feira de ideas onde se presentarán os proxectos.

Fase IV.- Feira de Ideas e Premios "Imaxina Coruña".

Data prevista: o sábado 26 de abril de 2025 , na Domus. A feira Imaxina Coruña terá lugar en horario de mañá e/ou tarde nas instalacións da Domus. Aos proxectos finalistas facilitaráselles un espazo (posto) rotulado co nome do centro ao que representan, así como co título do proxecto. Neste espazo o alumnado presentaralle ao público os seus proxectos e poderá acompañalos de vídeos expositivos, materiais publicitarios, audiovisuais, teatrais ou calquera outra ferramenta ou medio que estime oportuno co fin de conseguir un maior atractivo e atención sobre a súa proposta.

Unha vez visitados os espazos, o xurado retirarase a deliberar para comunicar o veredicto dos proxectos premiados. Para esta valoración o xurado deberá ter en conta: a autenticidade das investigacións, a súa orixinalidade, o seu rigor científico e tecnolóxico, o sentido crítico, a súa viabilidade, capacidade para mellorar a vida das persoas e todos aqueles aspectos que demostren curiosidade e constancia.

O xurado levantará acta do desenvolvemento e conclusións do veredicto, para o que actuará de secretario un/a técnico/a do SME. A decisión do xurado será inapelable. Pódese declarar deserto algún dos premios se así o considera.

PREMIOS

a) Premios para os proxectos Os premios virán establecidos en función de distintas categorías:

Premio á sostibilidade

Premio á innovación

Premio ao compromiso social.

Para cada unha das categorías deste concurso establécese como premio a invitación a participar ou visitar unha feira científica estatal, incluíndo gastos de desprazamento e aloxamento para os equipos gañadores e os docentes (máximo 5 persoas/grupo, incluído o docente). Para esta edición a feira elixida é: Zientzia Azoka, Bilbao, https://zientzia-azoka.elhuyar.eus (duración 1 día, en maio de 2025) Os grupos premiados que vaian participar na feira científica deberán adaptarse ás normas de participación establecidas nela.

b) Premio ao centro educativo

Ademais, cada centro educativo onde estea matriculado o alumnado premiado nas 3 categorías sinaladas recibirá un cheque regalo por importe de 500,00 euros para gastar nun establecemento comercial da cidade da súa elección. Este importe deberá destinarse para a adquisición de material científico e tecnolóxico para a aula participante no concurso.

c) Mención especial

A xuízo do Xurado poderase conceder unha mención especial, en función do carácter singular dalgún dos proxectos presentados polos grupos participantes. Establécese como premio un cheque regalo para o centro educativo por importe de 300,00 euros, para gastar nun establecemento comercial da cidade, a elección do centro, a condición de que ese establecemento estea conforme. Este importe deberá destinarse para a adquisición de material científico e tecnolóxico para a aula participante no concurso.

d) Premio aos vídeos dos proxectos

Aqueles grupos concursantes que presenten un vídeo relato do seu proxecto, publicarano en Youtube e someterase a votación popular os 3 días anteriores á celebración da feira. O gañador da votación popular será premiado cun estabilizador. As características do vídeo deberán ser as seguintes: duración máxima de 2 minutos; formato horizontal; resolución mínima de 720p e peso máximo de 50M.