Tanto as persoas expertas como a cidadanía coinciden en que nun municipio de dimensións moi reducidas, de carácter peninsular e cuxa cidade se estende funcionalmente cara aos concellos da súa futura área metropolitana, presenta a mobilidade e o acceso da cidadanía aos servizos como un dos seus factores críticos. Este factor pasa de ser un problema notable ao principal problema da cidade e a súa área de influencia.

Esta problemática non se poderá resolver unicamente cunha Estratexia de Desenvolvemento Urbano Sustentable Integrado (en diante EDUSI) pero a través dela daranse pasos decisivos orientados a resolver dinámicas de mobilidade interna entre os barrios da cidade e sentar as bases para unha futura mitigación da problemática a nivel supramunicipal.

Así, o Concello da Coruña deseñou e presentou a súa Estratexia DUSI na convocatoria do 2016 de axudas do FEDER aprobada pola Orde HAP/1610/2016, do 6 de outubro. A estratexia presentada polo Concello da Coruña, denominada EidusCoruña, foi SELECCIONADA para recibir axuda FEDER a través da Resolución do 18 de maio de 2017, da Secretaría de Estado de Orzamentos e Gastos, e a súa concesión foi ratificada como DEFINITIVA mediante a Resolución do 21 de xullo de 2017.