INFORMACIÓN XERAL

Operación: recuperación de locais en desuso para mozos e mozas e colectivos informais (LA33)

Obxectivo temático: promover a inclusión social e loitar contra a pobreza (OT9)

Orzamento: 450.102,03 €

Financiamento FEDER: 80%

Estado: terminada

Prazo de execución: 4 meses

Contratista: Jardinería Arce SL

DESCRICIÓN

O ámbito da actuación proxectada sitúase debaixo do viaduto da avenida de Alfonso Molina onde actualmente é zona de aparcadoiro. Coa execución das obras, instalarase neste espazo un parque de skate e unha pista deportiva, que incluirá unha pista de baloncesto con canastras e bancadas. Así mesmo, abordarase a reurbanización desta parte da praza José Toubes Pego, coa dotación dun novo paso de peóns e unha praza peonil.

A zona de actuación ten unha superficie de 1.504 m². A pista de skate ocupará aproximadamente 400 m², a cancha de baloncesto coas súas bancadas ocupará 361 m², e a praza peonil 176 m². A superficie restante corresponde a beirarrúas, zonas axardinadas, paso de peóns e ocupación dos piares do viaduto existente.

O trazado da pista de skate busca integrar a todos os usuarios e usuarias segundo a idade, modalidade e experiencia. Incluirá elementos innovadores para que unha persoa menos experimentada poida alcanzar unha evolución superando distintas etapas.

En canto á pista deportiva, deséñase unha pista de baloncesto con catro canastras e bancadas para o descanso e gozo das persoas usuarias.

Para unha mellor comunicación e accesibilidade da zona proxectada, dotarase dun novo paso de peóns na rúa Fernando Rey con rede semafórica e a mellora da contorna das pistas coa creación dunha praza peonil.

A execución das obras vén motivada, por unha banda, pola necesidade de dar resposta á demanda da poboación de espazos habilitados para a práctica de deportes urbanos, tales como skate, bmx, scooter, roller e baloncesto, resolvendo a dita demanda de tal forma que a práctica destes non supoña unha molestia para o resto da cidadanía e que, ademais, presente unhas características axeitadas dende o punto de vista de seguridade e idoneidade das estruturas tendo en conta que, ao estar situado debaixo dun viaduto, suporá o primeiro espazo cuberto na trama urbana para o desenvolvemento destes deportes.

Outra das necesidades que se queren satisfacer con esta actuación é a de dotar o centro xuvenil "O Remanso" dun punto de encontro e espazo no que desenvolver actividades deportivas como ferramenta de transformación social para o desenvolvemento integral das persoas, en especial, da mocidade.

LIGAZÓNS DE INTERESE

Solicitude Edi

Contratación

Proxecto técnico