Apostouse por estes sistemas de moderación do tráfico que deben cumprir unha serie de funcións que favorezan a mobilidade non motorizada e a accesibilidade da cidadanía, eliminando os posibles efectos negativos. Deben xerar unha redución do volume de tráfico rodado e favorecer a fluidez do tráfico, especialmente en zonas onde o volume de tráfico é denso, e o acceso aos vehículos de emerxencias é importante, evitando neste último caso, un incremento nos seus tempos de resposta. Sobre todo, deben fomentar o uso de medios de transporte alternativos tales como o transporte público, a bicicleta ou camiñar. É clave que as medidas de moderación de tráfico faciliten a accesibilidade tanto a escolas, como a lugares públicos, de lecer e comerciais. As zonas próximas ás escolas presentan un maior índice de risco en canto á seguridade viaria, debido a que as nenas e os nenos son os/as usuarios/as máis vulnerables.

Por último, estas medidas implican unha función social en relación á calidade de vida resultante grazas ás modificacións xeradas na contorna dunha área determinada, xa que a redución do tráfico e da contaminación, o incremento na seguridade, a mellora na accesibilidade, permite desenvolver áreas seguras para diferentes persoas usuarias, zonas verdes, áreas de aparcadoiro e de xogo etc., xerando desta maneira, unha contorna atractiva para as/os usuarias/os, incrementando a calidade de vida das persoas residentes.

Os obxectivos para cumprir, en resumo, con estas actuacións de calmado ou pacificación do tráfico poderían condensarse nas seguintes:

• Redución das emisións nocivas e ruído derivadas dos vehículos, debido a unha diminución no tránsito;
• Favorecer a mobilidade alternativa peonil e ciclista na zona;
• Redución da sinistralidade con reforzo da seguridade viaria;
• Protección de persoas usuarias especialmente vulnerables;
• Mellorar a conciencia das persoas condutoras con respecto a outras usuarias.

Os proxectos que se inclúen nesta actuación son os seguintes:

1. Pacificación do tráfico na contorna do CEIP de Prácticas e IES Salvador de Madariaga; co obxecto de crear e executar un sistema de resaltes consistente en dous lombos de asno, como medidas de pacificación do tráfico na contorna de ambos os centros escolares, á vez que se reforzaría a sinalización horizontal e vertical. As obras executáronse a finais do ano 2021.
2. R2.- Redución da velocidade na rotonda das Paxariñas: co obxecto de crear e executar un sistema de resaltes consistente en dous pasos peonís sobre elevados co fin de mellorar tamén a accesibilidade e o desprazamento seguro das persoas con discapacidade, así como o reforzamento de toda a sinalización horizontal e vertical como medidas de redución da velocidade no ámbito da rotonda das Paxariñas, confluencia coas rúas Álvaro Cunqueiro e Antonio Machado coa rúa José Miñones Bernández. As obras iniciáronse no último trimestre do ano 2021 e concluíron no mes de febreiro de 2022.

3. Remodelación dos cruzamentos da rúa Ramón y Cajal e a avenida do Exército: co obxectivo de mellorar o devandito cruzamento para regular o tráfico rodado e á súa vez dando continuidade e favorecendo a mobilidade alternativa peonil e ciclista na zona. Principalmente incidirase na seguridade viaria e a accesibilidade reconfigurando para iso os pasos de peóns de maneira que se mellore a seguridade viaria e a accesibilidade física. Pretendíase tamén satisfacer as seguintes necesidades da cidade: mellorar o tráfico, mellorar a mobilidade alternativa peonil e ciclista, mellorar a accesibilidade e comunicación con outras rúas, dotar a zona de materiais resistentes e duradeiros diminuíndo o mantemento e conseguindo unha maior durabilidade, ordenar os aparcamentos e mellorar en xeral as instalacións na zona. As obras iniciáronse no mes de outubro de 2022 e está prevista a súa finalización para o mes de xuño de 2023.