Actuacións

Entre estas actuacións, entre as que destacan a execución constante de carrís bici por todos os barrios da cidade e as súas conexións de tramos xa existentes, a modernización e ampliación do servizo público municipal de préstamo de bicicletas, preténdese dar un impulso máis ao uso da bicicleta privada coa adquisición e instalación na cidade de aparcabicicletas seguros, co que se pretende fomentar o cambio modal na contorna urbana cara a modos de transporte máis sostibles, priorizando a mobilidade activa a través do uso de bicicleta.

Obxectivo

O obxectivo que se pretende con esta contratación é favorecer a mobilidade ciclista, inclusiva e universal, reducir a contaminación asociada ao uso de vehículos, desenvolver unha política integral da bicicleta, facilitar os desprazamentos en bicicleta fomentando os modos non motorizados e diminuír a emisión de gases contaminantes e ruído.

Localizacións

Dentro das localizacións nas que se pretenden instalar estes equipamentos, déuselle prioridade á interconexión da rede de carrís-bici cos focos atractores/xeradores de desprazamentos na mobilidade cotiá, garantindo a accesibilidade e seguridade dos aparcabicicletas á cidadanía a través de estacións de ancoraxes resistentes e seguros contra o roubo e o vandalismo, así como a seguridade das persoas usuarias a través da localización en beirarrúas ou espazos adxacentes a estacionamentos ou en combinación con estes, que non obstaculicen nin o fluxo de ciclistas nin o de peóns/peoas. Preténdeselle dar prioridade á instalación destes elementos en puntos de intermodalidade existentes próximos a estacións e estacionamentos disuasorios, incluíndo lugares de transbordo tanto de autobuses urbanos, como interurbanos.