Na carpa de Aluvisa púidose observar como, cunha cámara de IA, se estaban a analizar e rexistrar en tempo real todas as persoas que pasaban sobre as ortofotos instaladas no chan dos Cantóns.

Todos os datos rexistrados nos 130 novos puntos de medida baseados en IA e Deep Learning que se están instalando na cidade permitirán dispoñer de moitos máis datos de mobilidade para a toma de decisións que afecten a todas as persoas integrantes da mobilidade da cidade.

Así mesmo, noutro dos monitores podíase visualizar a monitoraxe en tempo real do primeiro punto piloto instalado para o control da zona de carga e descarga da rúa Alfredo Vicenti. Este sistema permitirá dispoñer de todos os datos de ocupación das prazas de carga e descarga en tempo real e realizar o control do tempo de estacionamento de cada vehículo para favorecer a rotación de prazas de carga e descarga da cidade.

Como actuacións complementarias aos proxectos dos Fondos Next que se están levando a cabo na cidade tamén se instalou, na carpa de Aluvisa, un panel de mensaxería variable similar aos que se van instalar na cidade para informar a cidadanía de todo o relacionado coa mobilidade.

Con todo iso pretendeuse dar a coñecer o novo "Centro Integral da Mobilidade (CIMoB)" e todos os proxectos asociados a el, co fin de mellorar a mobilidade global da cidade.

Cómpre destacar, como denominador común con Policía Local, que se realizaron unhas xornadas de portas abertas durante a Semana Europea da Mobilidade, desde as 17.00 h, para asistiren todas as persoas que estivesen interesadas en coñecer a nova sala de control do tráfico, denominada CIMoB.