- Inicio
- Detalle Contenido
Día sen coches en San Andrés
Como cada ano o Día sen coches é a xornada de peche e con maior significación pública das celebradas na Semana Europea da Mobilidade.
A rúa de San Andrés xa é peonil cada fin de semana polo que a novidade que se ofrecía na xornada era a ocupación do espazo con actividades lúdicas e deportivas.
Entre os deportes elixidos este ano merece especial apunte a halterofilia.
Os levantadores e levantadoras de peso encheron a rúa fronte á fonte de Santa Catalina cos seus discos de pesas e mostráronlles ás persoas interesadas as dúas modalidades que rexen na súa competición: a arrancada e os dous tempos.
Que teñen que ver a halterofilia e a mobilidade?
O propósito municipal con estas actividades é devolverlle á cidadanía os espazos públicos. Por esa razón ten gran significación simbólica ocupar estas grandes vías para entregalas á peonalización ou ás bicicletas.
Na nosa cidade varios viarios polo volume de persoas usuarias que os empregan diariamente teñen gran repercusión no tráfico.
Desde logo Alfonso Molina, a avenida do Exército e San Andrés son algúns exemplos. Con todo, e grazas á ocupación peonil das fins de semana, entre a cidadanía evidénciase cada vez máis os desexos da súa peonalización diaria.
Púidose gozar de actividades de libre acceso para as/os menores de man da Sección de Seguridade viaria de Policía Local.
Aprendendo o manexo da bicicleta nunha situación real na vía pública.
Descubrindo os sinais verticais e marcas viarias que lles afectan aos vehículos.
Respectando o paso das e dos viandantes, semáforos...
Aprendendo desde a perspectiva da función policial no que varios/as alumnos/as se vestiron con chalecos policiais e dirixiron o tráfico.
Creáronse vínculos de confianza coa figura da Policía Local desde unha actividade lúdica e educativa
Púidose montar un circuíto viario no que os/as máis pequenos/as gozaban da xornada.
O corte da circulación nesta vía pon o broche de ouro á Semana Europea da Mobilidade co seu Día sen coches.
San Andrés converteuse nun circuíto onde se puideron celebrar multitude de actividades enfocadas aos nenos e ás nenas, saíron á rúa os patinetes, patíns, cars, bicicletas que rodaron pola calzada en substitución do coche.
Para amenizar a xornada e poñer a nota musical, novamente este ano contouse cos pasacalles, coa súa actividade de animación pola rúa para o goce dos e das que asistiron a esta xornada.
Neste día, pretendéronse divulgar os novos modelos de mobilidade urbana e concienciar a cidadanía sobre as alternativas de transporte máis sustentable e respectuoso co medio ambiente e coas necesidades da cidade.
Tes un navegador demasiado antigo!
Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible