Na estrutura que o concello dispuxo no Obelisco, instalouse o equipamento propio dunha destas estacións que estará a tomar datos ao longo de toda a semana, podéndose acceder a eles a través da web de información ambiental www.coruna.es/infoambiental (Estación UM Mobilidade). Igualmente na pantalla de información que tamén se dispuxo na carpa, ofreceranse os datos en tempo real de toda a rede municipal de vixilancia.

Para facer máis accesible e atractiva esta actividade, participará o equipo de monitores de educación ambiental para desenvolver actividades para todas as idades utilizando diversos recursos, como a ortofoto de gran formato da cidade (cos xogos Respira, Esquío coruñés, As 7 diferenzas e Carreira de bicis), ademais das exposicións nas árbores artificiais e diversos roll up con información ambiental e de mobilidade sostible.

Con todas estas actividades preténdese concienciar, sensibilizar e informar á cidadanía sobre o uso de modos de transporte sostibles, incidir no beneficio individual e colectivo á hora de elixir un modo de transporte non contaminante, proporcionar unha visión diferente da cidade grazas á mobilidade sostible, comprender a relación que existe entre algunhas formas de moverse e os problemas de contaminación que xeran, tendo en conta que o tema elixido pola Comisión Europea para a campaña deste ano 2021 é "Mobilidade sostible, saudable e segura" e o lema da campaña é "Pola túa saúde, móvete de forma sostible"