Dentro da programación da Semana Europea da Mobilidade, a sección de Educación Viaria da Policía Local da Coruña, organizou unha actividade de libre acceso aos menores, un número aproximado de 50 nenos e nenas que participaron nesta ocasión, desde a 17.00 h ata as 20.00 h.

OBXECTIVOS:

• Aprender o manexo da bicicleta nunha situación real na vía pública
• Descubrir os sinais verticais e marcas viarias que afectan aos vehículos
• Respectar o paso dos viandantes, semáforos...
• Aprender desde a perspectiva da función policial: varios alumnos vestíronse con chalecos policiais e dirixiron o tráfico
• Crear vínculos de confianza coa figura da policía local desde unha actividade lúdica e educativa

Para a realización desta actividade, utilizouse o corte previsto da rúa San Andrés, montouse o circuíto viario co material do remolque que nos presta o equipo de Educación Viaria da Policía Local de Narón.

Así mesmo, e debido á necesidade de atender as restricións impostas pola pandemia desde Sanidade, non se permitiu a ningún menor sen máscara participar no circuíto, e dado que non todos tiñan bicicletas ou patinetes, dispúxose dos ciclocars e patinetes do remolque que despois e antes de cada uso foron desinfectados.