Na Coruña, o bus urbano rexistra máis de 20.000.000 de usos anuais (datos de 2022), dos cales, estímanse 7.000.000 de usos nas liñas de bus que pasan pola área afectada pola actuación. Unha vez realizadas as obras, estímase que ademais de toda a poboación da cidade, beneficiarase de forma directa ou ben, indirecta, tamén un 20 % dos habitantes da área metropolitana.

O obxecto desta actuación é mellorar o funcionamento da rede de bus urbano da cidade (frecuencias, velocidade comercial e cobertura). Ademais, a reorganización desas rúas e as actuacións complementarias de urbanización levan:

• aumento de espazos peonís
• mellora da urbanización das rúas
• mellora da drenaxe de pluviais con nova rede separativa
• reorganización de sistemas de regulación e control de tráfico
• incremento de espazos verdes e árbores
• mellora de medio ambiente e paisaxe urbana
• mellora da calidade do aire e ruído nunha zona co 51 % de poboación afectada por niveis por riba de 55dB(A) pola noite e cun nivel de conflito acústico próximo aos 10 dB(A) en fachada. Igualmente, incluída en zona de potencial conflito por mala calidade do aire, provocada polas elevadas intensidades medias diarias dun tráfico de vehículo privado que se verán substancialmente reducidas.

Características:

Plataforma reservada lateral por Juan Flórez, en contradirección en dirección norte (entrada cidade), mediante eliminación da banda de aparcadoiro existente na marxe dereita no seu percorrido desde avda. Alfonso Molina ata a praza de Pontevedra. O seu trazado comeza na praza Antonio Tenreiro, prosegue ao longo de Juan Flórez ata a súa intersección coa rúa Betanzos; alí localizaríase a parada de cabeceira/final de liña, e suprimiríase o tráfico rodado nesa rúa. A continuidade cara a praza de Pontevedra (liñas que o requiran) ou o comezo de percorrido realizaríase por Francisco Mariño, virando cara á rúa Juan Flórez ou cara a praza de Pontevedra.

Vehículos autorizados:

Buses urbanos, metropolitanos, taxis e servizos de emerxencia. Uso limitado para residentes en acceso a garaxes. Nas interseccións máis complexas prevese considerar a prioridade do transporte público en bus, mediante sinalización horizontal e vertical.