As persoas consumidoras necesitan información, pero tamén formación e educación adecuada en materia de consumo. Formar persoas consumidoras responsables e coñecedoras das consecuencias dos seus actos constitúe hoxe unha das metas da educación.

A finalidade da educación para o consumo é proporcionar as ferramentas necesarias para adquirir os coñecementos e habilidades que permitan unha maior liberdade e racionalidade no consumo de bens e na utilización de servizos.

A educación escolar, as oficinas de información ás persoas consumidoras, os medios de comunicación públicos e as asociacións de consumidores/as son instrumentos fundamentais para iso.

O Concello da Coruña é plenamente consciente de que as institucións deben facer esforzos para lograr que todas as persoas actúen como consumidoras responsables. Necesitamos unha cidadanía responsable que asuma os seus deberes, pero tamén que saiba defender os seus dereitos.

Desde aquí proporciónase a formación en materia de consumo que demanden os distintos colectivos interesados, poñendo ao servizo da cidadanía coruñesa unha variedade de actividades e un asesoramento específico vinculado ao ámbito da información e formación para o consumo responsable.