Andaina

A Concellaría de Igualdade e Participación Cidadá organizou en outubro de 2008 a exposición "25 anos de Andaina", un percorrido sobre os vinte e cinco anos de existencia da máis antiga revista de pensamento feminista galega. Os paneis que conforman esta exposición puideron verse no Fórum Metropolitano entre os días 13 e 16 de outubro. A conmemoración cerrouse o propio 16 de outubro cunha mesa redonda onde algúns membros do Consello directivo da revista repasaron os difíciles máis exitosos anos da súa existencia.

Posteriormente, durante a segunda edición do Festival Mulleres arte+parte, os cidadáns e cidadás da Coruña tiveron unha nova oportunidade de achegarse a esta exposición que representa unha escolma dalgunhas das súas portadas históricas.

Contra vento e marea

Durante o mes de setembro de 2009 desenvolvéronse na Coruña as xornadas "Contra vento e marea. Verbas e pegadas dos feminismos", organizadas pola Casa-Museo Emilia Pardo Bazán e coa colaboración da Deputación Provincial da Coruña e a Concellaría de Igualdade e Participación Cidadá do Concello da Coruña. Charlas, exposicións en espazos urbanos, danza, Mari-Bingo....que, desenvolvidas na sede da Casa-Museo, no Paraninfo da Universidade ou no Obelisco da Coruña e murallas do Parrote, serviron para analizar a historia dos diversos feminismos e a súa actualidade e vitalidade.