Concello da Coruña

Estudo de gases de efecto invernadoiro

Ao longo do ano 2008 realizouse un estudo de emisións de gases de efecto invernadoiro (GEI) nos edificios municipais; e dende o punto de vista enerxético en todos os edificios, instalacións e servizos municipais, así como auditorías correspondentes. Ese traballo, de escaso orzamento, tivo un carácter fundamentalmente informativo, para coñecer, a modo xeral, a situación na que se encontraban os nosos inmobles dende o punto de vista enerxético.

Plan de sinalización

A finais do 2009 o Practise levou a cabo unha campaña de sinalización na cidade co fin de incrementar o coñecemento sobre a enerxía sostible e mellorar o consumo enerxético. Esta campaña estaba dirixida a traballadores municipais, usuarios de edificios municipais e poboación en xeral.

A iniciativa consistiu na colocación de elementos de sinalización de diferentes formatos que recollían recomendacións co obxectivo de reducir o consumo e mellorar a eficiencia enerxética.

Diferentes tipos de edificios foron sinalizados incluíndo instalacións deportivas, colexios públicos, edificios administrativos e edificios públicos como o Palacio da Ópera, a Casa dos Peixes, a Domus, o Fórum, as oficinas de Medio Ambiente, a Oficina de Rehabilitación, etc., con recomendacións e boas prácticas para os traballadores e usuarios externos co fin de reducir o consumo enerxético e mellorar a eficiencia enerxética.

Entre as mensaxes que se incluíron nos sinais podemos atopar:

• Cando vaias fotocopiar, acumula documentos.
• Non climatices áreas baleiras. Sé intelixente coa enerxía.
• Coa sala baleira, apaga a luz.
• Ilumina de forma intelixente. Pensa na enerxía que se consome.
• Se non os usas, desconecta o cargador do móbil e o portátil.
• Aproveita ao máximo a luz solar. É máis natural e aforras enerxía.
• Co aire acondicionado, cerra portas e ventás.
• Ao final do día apaga impresoras, fotocopiadoras e ordenadores.
• Configura o modo de aforro dos teus equipos.
• Evita o uso dos ascensores.
• Cerra a billa, axudas a aforrar enerxía.

A campaña acompañouse dun anuncio dirixido ao persoal municipal no que se lle indicaban as diversas formas que permiten un aforro adecuado da enerxía.

Código de boas prácticas

Como complemento á campaña de sinalización e en apoio á súa implantación de forma eficaz, elaborouse un Código de boas prácticas con medidas de carácter básico para adoptar polos usuarios dos edificios municipais para unha redución do consumo de recursos e unha maior eficiencia enerxética, que foi implantado en todas as dependencias municipais grazas a xornadas de formación in situ.