O Servizo de Participación Cidadá está a traballar na confección dun completo mapa de recursos do tecido asociativo da cidade, unha guía do asociacionismo, co obxectivo de fomentar lazos de cooperación, planificar accións colectivas, dinamizar o funcionamento daquelas entidades menos activas e establecer un sistema operativo para compartir os recursos de que dispoñen cada unha das asociacións.

Para iso, recolleuse diversa información e reuníronse datos das entidades sen fin de lucro da Coruña, de modo que se dispoña dun coñecemento actualizado acerca do traballo levado a cabo por cada unha de elas e unha completa relación de locais, espazos, equipamento e actividades desenvolvidas.

A Guía do Asociacionismo abrirá o abano de posibilidades para que o entramado asociativo da Coruña inicie novas actividades, de xeito individual ou colectivamente, con outras entidades coas que compartan intereses.