Consiste na utilización dun preparado hormonal ou dun DIU despois dunha relación coital con risco de embarazo, ben porque non utilizásemos método anticonceptivo ou ben porque nos fallase o método (rotura de condón, esquecementos de pílula...)

A PASTILLA DO DÍA SEGUINTE O PÍLULA POSTCOITAL

Esta é a medida de urxencia máis utilizada. Consiste nun preparado hormonal que se ten que tomar nas 72 horas seguintes ao coito efectuado sen protección, e o que fai é impedir que o óvulo aniñe, no caso de que fose fecundado.

• QUE EFICACIA TEN?

É moi eficaz, e moito máis cando antes a tomes: a máxima eficacia alcánzase tomándoa nas 24 primeiras horas.

• COMO ACTÚA?

Altera a capa interna do útero (endometrio), impedindo a progresión dos espermatozoides e impedindo a fecundación. Este método non serve para interromper o embarazo, é dicir, para abortar.

• EN QUE CONSISTE? COMO SE TOMA?

Aínda que se fale de pastilla "do día seguinte", en singular, na realidade non é unha soa pastilla, senón varias, que han de tomarse tal e como indique o persoal sanitario.

Hoxe en día dispénsase pola Seguridade Social, no Centro de Orientación Familiar (COF) e nas farmacias.

Se precisades usala, acudide canto antes (aínda que lembra que tes 72 horas de prazo) e contade exactamente o que vos ocorreu, sen medo nin vergoña. O profesional encargarase de facer unha valoración e receitarávola, se así o considera oportuno. Non sempre é necesario tomala. Se vola receitan, é importante que sigades a pauta médica ao pé da letra.

SOBRE TODO, LEMBRA QUE A PÍLULA DO DÍA SEGUINTE NON É UN ANTICONCEPTIVO MÁIS. É UN MÉTODO DE EMERXENCIA, QUE DEBES EMPREGAR SÓ EN CIRCUNSTANCIAS EXCEPCIONAIS.

Non se debe confundir a pílula do día seguinte coa pílula abortiva. Son cousas totalmente distintas:

A pastilla do día despois actúa antes de que se produza o embarazo, alterando as condicións do útero precisamente para evitar que o embarazo chegue a producirse.

A pílula abortiva, en cambio, é un preparado que se administra a mulleres embarazadas e que desexan abortar. Falaremos dela ao tratar do aborto.

O DIU

Unha vez que pasaron 72 horas, e ata as primeiras 120, hai outra posibilidade de anticoncepción de emerxencia, que é a inserción dun DIU.