Dáte de alta como persoa demandante de emprego

O primeiro que tes que facer é darte de alta como persoa demandante de emprego no Servizo Público de Emprego de Galicia. Para saber que oficina che corresponde preme aquí

Por que?

• Porque terás dereito a solicitar orientación laboral.
• Porque terás dereito a solicitar formación para o emprego.
• Porque é un requisito imprescindible para poder solicitar a inclusión nun programa de emprego.
• Porque terás acceso ás ofertas de emprego que se xestionen a través do Servizo Público de Emprego de Galicia.

Onde o fago?

Tes que acudir presencialmente á oficina do Servizo Público de Emprego de Galicia que che corresponda polo código postal de onde esteas empadroada/o.

Como o fago?

Tes que solicitar cita previa. Podes facelo de dúas formas:

• Chamando ao 012
• A través da seguinte ligazón: https://emprego.xunta.es/citaprevia/

Na parte da web "preguntas frecuentes", explican paso a paso como podes facelo.

MOI IMPORTANTE!: SE ES MENOR DE IDADE NON EMANCIPADO, NECESITAS AUTORIZACIÓN DOS TEUS PAIS. Premendo aquí podes obter o modelo de autorización.

Que teño que levar?

O teu DNI e os títulos dos que dispoñas.

Unha vez que esteas de alta:

• Xérase o DARDE (Documento de Alta e Renovación da Demanda de Emprego), que é o documento que acredita que es demandante de emprego. Nel indicarase a data de inscrición e a data na que se debe renovar.
• Terás acceso a aplicación MOBEM, desde a que poderás xestionar a túa demanda de emprego (renovación, solicitude orientación laboral...).

Inscríbete en Garantía Xuvenil

Se tes entre 16 e 29 anos, Rexístrate no sistema de Garantía xuvenil. Contámosche de que vai noutro apartado: Garantía xuvenil

Solicita orientación laboral

Solicita orientación laboral para axudarche na xestión da túa procura de emprego: establecerán o teu perfil profesional, revisarán o teu currículo, ensinaranche como potenciar as túas habilidades profesionais e como aproveitalas nas entrevistas de selección, diranche como crear a túa marca persoal, sinalaranche as túas necesidades formativas etc.

Onde podo solicitar orientación laboral?

• Todas as oficinas dos Servizos Públicos de Emprego de Galicia ofrecen orientación laboral, só tes que solicitalo.
• A maioría dos concellos dispoñen deste servizo. Na Coruña xestiónao o Centro Municipal de Emprego. Podes pedirlle unha cita chamando ao 981 184 399 ou a través do seu formulario web.
• Se es beneficiaria ou beneficiario de Garantía Xuvenil acude a algunha das entidades intermediarias deste programa.
• As universidades adoitan ter un servizo de emprego e emprendemento.
• Tamén podes consultar en colexios e asociacións profesionais.
• Consúltanos se tes outras opcións.

Pescuda en Internet: hai blogs e vídeos que poden ser moi útiles.

Onde busco traballo?

É esencial diversificar a procura utilizando todas as vías posibles. Non descartes ningunha. As principais son as seguintes:

• Internet. Existen multitude de portais de emprego e páxinas web especializadas en sectores de emprego. Noutro apartado deixámosvos unha listaxe organizada que vos pode ser útil. Pica aquí.
• Move a túa rede de contactos.
• Autocandidatura. Envíalles o teu CV ás empresas nas que che interese traballar.
• Envíalles o teu CV a empresas de traballo temporal ou ponte en contacto con axencias de colocación. Máis abaixo deixámosche unha listaxe das que teñen sede na Coruña.
• Acude a feiras e foros de emprego.

É imprescindible estar ao día en calquera novidade no teu sector de actividade.