Que é o voluntariado?

O voluntariado é o conxunto de actividades de interese xeral que teñen carácter solidario, sempre que a súa realización sexa libre, se leven a cabo sen contraprestación económica ou material, e que se desenvolvan a través de entidades de voluntariado conforme a programas concretos, tanto dentro como fóra do territorio español.

Que se consideran actividades de interese xeral?

Son actividades de interese xeral as vinculadas coa acción social e os servizos sociais, as de natureza sociosanitaria, de defensa dos dereitos humanos, da infancia, das persoas con discapacidade, da efectividade dos dereitos en condicións de igualdade das mulleres, educativas, de cooperación ao desenvolvemento, de loita contra a pobreza e a exclusión social, culturais, de defensa do patrimonio cultural, científicas, de fomento do uso de novas tecnoloxías, de protección civil, de prevención de situacións de emerxencia, de protección de persoas consumidoras e usuarias, deportivas, de lecer e tempo libre, de defensa ecolóxica e protección do medio ambiente, de defensa dos dereitos lingüísticos, de dinamización do mundo rural, de defensa da economía ou da investigación, de desenvolvemento da vida asociativa, de fomento da acción voluntaria ademais de todas aqueloutras que poidan contribuír á consecución dos principios da acción voluntaria.

Que non é voluntariado?

As actividades illadas ou esporádicas, periódicas ou non, prestadas á marxe de entidades de voluntariado, as executadas por razóns familiares, de amizade ou de boa veciñanza. Ademáis, no voluntariado non pode substituír nunca o traballo remunerado ou a prestación de servizos profesionais retribuídos.

Entón, se quero facer un voluntariado tería facelo a través dunha entidade de acción voluntaria?

Sí.

Que son as entidades de acción voluntaria?

Son entidades de acción voluntaria aquelas entidades legalmente constituidas, que non teñen ánimo de lucro, isto é, que non buscan beneficio económico, e que de modo organizado e estable realizan programas específicos de voluntariado.

Poden ser entidades privadas ou públicas (é dicir, unha administración: Estado, Xunta, concellos, deputacións...).

Como sei que unha entidade é de acción voluntaria?

A Xunta ten un Rexistro de Entidades de Acción Voluntaria. Podes utilizar o buscador da seguinte ligazón: https://voluntariadogalego.org/entidades

Teño que ser maior de idade para facer un voluntariado?

Non. As persoas menores de idade poderán participar en programas e proxectos de voluntariado especificamente adaptados ás súas características, mediante autorización expresa das súas nais, pais, titores ou da institución que os teña ao seu cargo, con respecto en todo caso á vontade da ou do menor.

Que teño que facer se quero ser persoa voluntaria?

O primeiro paso é pensar ben cales son os teus interereses e que podes facer polos demais. Analiza as entidades da túa zona, fala con elas e decide. E pensa ben cal é o tempo do que dispoñes.

Unha vez que o teñas decidido, deberás poñerte en contacto coa entidade que elixiras e presentar a túa petición por escrito. A entidade ten a obriga de proporcionarche a información, formación e o asesoramento adecuado, así como os medios que precises. Tamén terán que facerche unha póliza de seguro.

Xa, pero como busco un voluntariado na Coruña?

O Concello abriu a Oficina Municipal do Voluntariado. Alí botaranche unha man.

Oficina Municipal de Voluntariado:

Rúa Castiñeiras, 23 - baixo (zona Cuatro Caminos)

Horario de atención presencial para consultas (cita previa) de luns a venres (agás festivos) de 09:00 a 14:00 h

Teléfonos: 981 184 200 - Extensións: 33022 / 33016

Punto de apoio do Paseo das Pontes

Paseo das Pontes s/n (tamén acceso pola Ronda de Nelle, á altura do nº 140)

Horario de atención presencial para consultas e asesoramento (sen cita): martes e xoves de 17:00 a 19:00 h

Teléfono: 652 547 925

Como poderei acreditar que fixen un voluntariado?

As entidades teñen a obriga de faciltarte unha certificación da túa participación na que se expresen, polo menos, a súa natureza e as datas nas que as realizaches. Se o solicitas, tamén terán a obriga de remitilo ao Rexistro de Acción Voluntaria para que podas acreditar o teu historial de experiencias na acción voluntaria.