Están dirixidos tanto aos tres clubs de lectura, Café con libros, como ao resto da poboación do barrio e da cidade. Aínda que promovemos e asistimos á variada oferta literaria da cidade ao longo do ano, sempre é unha motivación extra para todas, contar con autoras e autores na nosa propia Biblioteca e/ou con actividades específicas dirixidas ás lectoras fieis de Café con libros.

Para este 2024 recibiremos a Xurxo Souto para falar da relación música + poesía e homenaxear así a Luísa Villalta. Conversaremos con Alejandro Tobar sobre a tradución ao galego de obras de prestixio. Profundizaremos na historia real de Josefina Arruti e de Bibiano F. Osorio-Tafall a través da novela Vémonos mañá de Xosé Monteagudo. E finalizaremos da man de Paula Carballeira e As alumnas, Premio Nacional de Literatura Dramática 2023.