Vivimos na chamada era da información ou tecnolóxica asociada coa revolución dixital iniciada na segunda metade do século XX. Actualmente, o noso día a día está influenciado polo constante bombardeo de información que nos chega a través de diferentes canles e medios. Xorden así conceptos como o da infoxicación, exceso ou sobrecarga de información, que impide que afondemos nos temas que nos interesan. Esa sobrecarga de información non contrastada é caldo de cultivo para a rede de noticias non verdadeiras, as chamadas "fake news". Estes feitos modifican o noso modo de vida, os nosos costumes, o consumo duns produtos ou outros, a opinión pública... 

Por iso dende a Biblioteca Fórum queremos poñer sobre a mesa a importancia da alfabetización mediática e informacional para que a cidadanía aprenda competencias e habilidades técnicas, cognitivas, sociais, cívicas, éticas e creativas para desenvolverse nos medios actuais, producir contido e entender dunha maneira máis crítica a información que se recibe. É dicir, alfabetizar e educar para que a cidadanía adquira a capacidade de acceder, analizar, avaliar, crear e actuar utilizando todas as formas de comunicación. 

Obxectivos

• Descubrir estratexias e actividades que se poden implementar na biblioteca para formar lectores/as e cidadanía activa, competente e crítica. 
• Aumentar a conciencia das persoas sobre as moitas formas de mensaxes mediáticas que se atopan na súa vida cotiá. 
• Destacar a importancia que as falsas noticias e os embustes teñen como ameaza da obxectividade da información e a intencionalidade de manipulación que esconden estas prácticas. 
• Contribuír á necesidade de crear unha igualdade de condicións entre quen produce a información cos seus propios intereses, e quen a consome, inocentemente, como noticias ou entretemento.