«As malas bibliotecas só constrúen coleccións. As boas bibliotecas constrúen servizos (e unha colección é só unha de moitas). As grandes bibliotecas constrúen comunidades«. David Lankes

O Día das Bibliotecas pon en valor o traballo que realizan todas as bibliotecas para conectar as súas persoas usuarias, crear redes de apoio e colaboración, fomentar a participación e o diálogo cidadán, facer accesible a cultura e o coñecemento a toda a poboación, independentemente da súa idade, xénero, raza ou lugar de residencia.

"Tecendo comunidades" salienta esta importante función social das bibliotecas. Elas dan forma á nosa comprensión colectiva, facilitan o intercambio de ideas diferentes e proporcionan un espazo seguro para o crecemento persoal e colectivo. Cada visita, cada lectura, cada conversa, achega o seu fío único a este tecido comunitario. A través destes intercambios e conexións, as nosas diferenzas e similitudes únense, mostrando a diversidade e riqueza das nosas comunidades.

As Bibliotecas Municipais da Coruña conmemoramos o noso día dando visibilidade ao noso traballo, informando do que ofrecemos nas bibliotecas da rede con servizos e actividades que coidan da xente e celebrando o noso día con varias actividades.

• As bibliotecas non só prestamos libros e somos aptas para todos os públicos.
• Somos lugares de aprendizaxe.
• Ofrecemos recursos gratuítos.
• Facilitamos o acceso ao mundo dixital.
• Contamos con espazos para sentirse como na casa.
• Cremos na importancia dos autocoidados.
• Creamos identidade sendo a memoria da cidade.

Cidadanía e servizos protagonizarán unha efeméride coa que pretendemos visibilizar o imprescindible lugar que ocupan no cotián da comunidade tal e como se desprende dos diversos testemuños que nos fixeron chegar.

Así celebramos o Día da Biblioteca

Preparamos unha variedade de actividades para celebrar o noso día contigo:

• Boyanka Kostova no AgoraSón do outono 2023 (organizado en colaboración con Normalización Lingüística)
• Viaxamos a Xixón cos nosos clubs de lectura ao Premio Princesa de Asturias das Letras.
• Taller interxeracional de xogos de mesa: actividade dentro do programa "De meu, de teu, de seu" entre o alumnano de ESO do IES Fernando Wirtz e as persoas usuarias do programa "Maiores e máis"
• Encontro coas bookstagramers Littera Lupa e Surfeando libros polo Día da Biblioteca .
• Encontro para familias: Obradoiro de bordado literario, con Lúa Mosquetera
• Conferencia de Javier Padín: A Biblioteca da Casa Consulado: o soño dun ilustrado (primeira biblioteca pública da cidade) impartida polo historiador Javier Padín na Biblioteca de Estudos Locais.
• Cineclub: mulleres LBT. Loving Highsmith : espazo de encontro para persoas que se reúnen na biblioteca para debater e analizar pezas cinematográficas ou documentais dispoñibles na plataforma gratuíta de streaming eFILM que as bibliotecas poñen a disposición das súas socias e socios.
• Visita dos clubs de lectura de Fórum á Exposición sobre a historia da varíola organizadas pola Real Academia de Medicina.
• Mostra bibliográfica Comunidades que un día foron, que recolle unha selección de títulos onde grupos de seres humanos crearon comunidade a partir do seu idioma, da raza, a relixión, dos costumes, valores, status social, procedencia etc... uníndose ou diferenciándose nun abano de historias o máis diverso e suxestivo.
• Mostra bibliográfica: Aptas_para_todos_os_públicos, selección de libros, lectura, librerías, persoas ás que os libros lles cambiaron a vida e como non... bibliotecas! Dispoñible para consulta e préstamo na Biblioteca Ágora.
• Conversa no Blog Suma Ágora con Carolina Raposo Barreira, colaboradora e usuaria da Asociación a prol das persoas con discapacidade intelectual de Galicia (Aspronaga) e voluntaria na Biblioteca Ágora: "Aprender e coñecer xente é o que máis me gusta do voluntariado na biblioteca".
• Conversa no Blog Suma Ágora con Ana Belén Louzán García, vicepresidenta da ONG Viraventos e responsable de Acción Social no marco desta entidade enfocada en dar acollida e orientación aos colectivos inmigrantes chegados a Galicia: "A rede de bibliotecas municipais é un recurso extremadamente útil".
• Conversa no blog Suma Ágora con Iolanda Sánchez Méndez, profesora de lingua galega e actual responsable da Biblioteca Escolar do IES Agra do Orzán: "Toda a comunidade educativa valora o traballo da biblioteca escolar".
• oFalarNonTen# con Boyanka Kostova
• E se nos visitas o mesmo 24 de outubro... poida que teñamos algún detalliño para ti.