As Bibliotecas Municipais da Coruña conmemoramos o noso día dándolle visibilidade ao noso traballo e defendendo a existencia das bibliotecas a través dos testemuños dalgunhas das nosas usuarias e usuarios ademais de mostrar a seguridade dos espazos bibliotecarios:

• Bibliotecas, espazos seguros
• Bibliotecas, servizos esenciais

Cidadanía e servizos protagonizarán unha efeméride coa que pretendemos visibilizar o imprescindible lugar que ocupan no cotián da comunidade tal e como se desprende dos diversos testemuños que nos fixeron chegar.

Lectores e lectoras, membros dos clubs de lectura, persoal voluntario participante de programas de formación ao longo da vida e bibliotecarias unen a súa voz nunha mensaxe que mostra a rede de bibliotecas como un espazo onde desenvolver a actividade cultural dun xeito seguro e que supón unha invitación para volver ocupar as nosas instalacións tras uns meses de adaptación á nova realidade onde os servizos virtuais seguiron dando cobertura a moitas das necesidades.