Con motivo do centenario do nacemento dunha das grandes divas da ópera internacional, a Biblioteca Municipal de Estudos Locais réndelle homenaxe a María Luisa Nache cun acto conmemorativo que destacará a súa traxectoria e legado.

María Luisa Nache fixo o seu debut no Teatro Rosalía de Castro no papel principal da ópera Aída, e desde entón, ata a súa retirada dos escenarios, percorreu os principais teatros líricos do mundo, interpretando sempre roles protagonistas. Entre os seus logros, destaca a súa actuación na Scala de Milán, onde cantou a ópera Medea xunto á lendaria María Callas.

Durante o evento, proxectarase un vídeo con material documental que a biblioteca conserva sobre a figura de Nache, extraído da colección Ramiro Cartelle, adquirida polo Concello no ano 2000.

Posteriormente, o doutor en Estudos Literarios e licenciado en Filosofía e Letras José Luis Méndez Romeu ofrecerá unha conferencia titulada "María Luisa Nache: a soprano internacional coruñesa".

Para pechar a homenaxe, a soprano moldava Clara Jelihovschi, profesora e pianista acompañante no Conservatorio Estatal de Chisináu, ofrecerá un concerto con pezas destacadas do repertorio de María Luisa Nache, acompañada ao piano por Gabriel López, profesor do Conservatorio de Música da Coruña.

Entrada libre ata completar a capacidade