- Inicio
- Coñécenos
- Somos a túa historia
- Os grupos de traballo
Os grupos de traballo
Nas Bibliotecas Municipais da Coruña cremos na importancia do traballo colaborativo como medio de acadar resultados de maior calidade.
O día a día de cada biblioteca, as súas actividades, servizos, consultas, etc... dificultan que os bibliotecarios e bibliotecarias de cada un dos 8 centros poñan en común as súas impresións e experiencias. Por iso, optamos pola creación de grupos de traballo de diversas temáticas que axuden a incidir en áreas de interese para todos os usuarios e usuarias e para as propias bibliotecas.
Grupo de traballo web 2.0
Atendendo especialmente aos usuarios e á vista das posibilidades que proporcionan as ferramentas 2.0, nas BMC apostouse polas novas aplicacións da Web Social (blogs, Flickr, Facebook, Twitter...) porque ofrecen un marco idóneo para mellorar a comunicación, difundir os servizos bibliotecarios e establecer medios de participación que axuden na mellora continua.
O grupo de traballo está actualmente constituído por doce persoas repartidas entre o servizo de coordinación e as oito bibliotecas, son os responsables de actualizar os perfís sociais institucionais, difundindo as actividades que teñen lugar en cada biblioteca e ademais:
- Escoitar o que se di da organización, as suxestións ou reclamacións que tradicionalmente se recollían nas bibliotecas en soporte papel.
- Dinamizar os espazos sociais institucionais: recomendando, orientando e e falando con usuarios reais e potenciais
- Primar a trasparencia, sen pretender ocultar nada e buscando sempre unha reposta satisfactoria
O grupo está coordinado dende servizos centrais onde se encargan de planificar, impulsar e avaliar a presenza das bibliotecas na Web Social de forma continua e pautada, faise imprescindible planificar os medios, os obxectivos, os tempos de publicación, etc.
Para axudar a realizar as tarefas de forma homoxénea e romper barreiras no uso das ferramentas sociais elabóranse documentos de traballo, titoriais e procedementos que facilitan a colaboración nestes medios a calquera persoa da organización e explican a súa filosofía, o porque da súa presenza, proporcionan best practices, etc:
- Libro de usos e manual de estilo
- Manual de directrices de etiquetaxe en medios sociais
- Protocolo de calidade para a implementación da ferramentas da web social
Mensualmente extráense e analízanse diversos datos de todas e cada unha das ferramentas que permiten observar o comportamento e a evolución destes perfís sociais e poñelos en relación cos esforzos requiridos. Para esta medición séguese a métrica AIR, que observa a actividade nos medios sociais, a interacción que xera e o retorno do investimento que se consegue. Para isto téñense en conta tanto indicadores cuantitativos como cualitativos.
O ecosistema dixital das Bibliotecas Municipais da Coruña vertebra unha biblioteca 2.0 que constitúe unha auténtica infraestrutura social participativa que xera e mantén vínculos coa cidadanía en xeral, e cos usuarios das bibliotecas en concreto, ademais de que axuda a estreitar relacións con outras institucións culturais (fundacións, asociacións, bibliotecas etc.) e é frecuente a presenza das Bibliotecas Municipais da Coruña nos foros e encontros profesionais.
Grupo de traballo Fancómic
Fancómic é o grupo de traballo dedicado á promoción e difusión da colección de cómic das Bibliotecas Municipais da Coruña.
As razóns que motivaron a creación deste grupo céntranse en primeiro lugar na importancia cuantitativa e cualitativa das comitecas das bibliotecas vinculada á alta demanda dos nosos usuarios, e en segundo termo ao auxe do cómic na cidade da Coruña cuxo máximo expoñente é o festival internacional Viñetas desde o Atlántico.
O grupo está formado por, polo menos, un representante de cada unha das 8 bibliotecas do sistema máis un coordinador do servizo central e as súas funcións fundamentais pasan pola definición da política de compras, a programación de actividades ou o mantemento do blog Fancómic.
O blog Fancómic, creado en agosto do 2006, supón o gran punto de encontro virtual para bibliotecarios, afeccionados e autores de cómic. Ademais de ser o vehículo de expresión sobre actividades, colección e servizos das bibliotecas municipais en relación ao mundo do cómic. Permite a interactuación con usuarios e a vinculación con editores e autores grazas especialmente a que moitos deles están instalados na Coruña.
Fancómic recibiu no 2008 o Premio Ourense de Banda Deseñada polo seu labor de divulgación e promoción do cómic galego nos últimos anos. Con este premio búscase destacar a importancia das bibliotecas como órgano de primeira importancia na difusión do cómic na sociedade.
Grupo de traballo Biblioteca Verde
O grupo de traballo Biblioteca Verde créase coa intención de concretar o compromiso do Sistema Municipal de Bibliotecas arredor do medio ambiente. Dende o ano 2010 o SMB recolle a sensibilización respecto de prácticas e hábitos sustentables dentro dos seus obxectivos de calidade.
O obxectivo xeral é a sensibilización respecto de prácticas e hábitos sustentables e de respecto á natureza, buscando asociar a imaxe das nosas bibliotecas cun coherente e firme compromiso ambiental.
Os obxectivos específicos son os seguintes:
- Dar a coñecer e poñer en valor o noso fondo relativo á sustentabilidade e o medio ambiente.
- Asumir o compromiso ambiental nas nosas prácticas internas e interiorizar hábitos conscientes e responsables por parte do persoal.
- Formar e informar os nosos usuarios sobre alternativas de consumo consciente e responsable, proporcionando un espazo a entidades e organizacións locais e dando a coñecer experiencias que se desenvolven na nosa cidade.
- Favorecer o desenvolvemento sustentable da nosa comunidade ofrecendo información e elementos de reflexión e debate, contribuíndo a formar unha sociedade formada e responsable na súa toma de decisións.
Tes un navegador demasiado antigo!
Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible